पोखरा । चितवन राइनोजका कप्तान पारस खड्काले अग्रपंक्तिका ब्याट्सम्यानले राम्रो प्रदर्शन गरेका कारण प्रतियोगितामा पहिलो जित निकाल्न सफल भएको बताएका छन् ।

पोखरामा जारी नमस्ते पोखरा प्रिमियर लिग (पिपिएल) को अघिल्ला दुई चितवन राइनोज पराजित भएको थियो । अग्रपंक्तिका ब्याट्सम्यानबाट राम्रो प्रदर्शन नहुनुलाई कप्तान पारसले हारको कारण बताउदै आएका थिए । तर, बुधबार धनगढी ब्लुजविरुद्धको तेस्रो खेलमा त्यही अग्रपंक्तिका ब्याट्सम्यानले उत्कृष्ट प्रदर्शन गरेपछि चितवन राइनोजले १ सय २६ रनको फराकिलो नतिजा निकालेको छ । 

“सुरुको दश ओभरमा हामीले विकेट गुमाएनौं । अनिलकुमार र हरीशंकरले हाम्रो योजनाअनुसार खेले । त्यो लयलाई अन्य ब्याट्सम्यानले पनि कायम राखे,” चितवनका कप्तान पारसले भने “१ सय ९४ रनको योगफल राम्रो हो । जसका कारण बलरले विना दबाब खेल्न पाए ।”
ओपनरद्धय अनिलकुमार शाह र हरिशंकर शाहले पहिलो विकेटका लागि प्रतियोगिताकै ठुलो १ सय १ रनको साझेदारी गरेपछि चितवनले निर्धारित २० ओभरमा ५ विकेट गुमाएर १ सय ९३ रनको योगफल बनाएको थियो ।     १ सय ९४ रनको लक्ष्य पछ्याएको धनगढीले १६.२ ओभरमा सबै विकेट गुमाएर ६७ रनमात्र जोड्न सक्यो । तीन खेलबाट २ अंक जोडेको चितवनले अब काठमाडौं रोयल्स र विराटनगर टाइटन्सविरुद्ध खेल्न बाँकी छ । उपाधि होडलाई कायमै राख्न चितवनलाई बाँकी खेल जित्नै पर्ने दबाब छ ।  

“प्रतियोगितामा यो हाम्रो पहिलो जित हो । हामीलाई यति थाहा छ, अब बाँकी दूूई खेल जसरी पनि जित्नै पर्छ”, कप्तान पारसले भने, “जितबाट खुशी छौं । हाम्रो यात्रा अहिले नै सकिएको छैन । हामीले राम्रो पुनरागमन गरेका छौं ।”

चितवन पहिलो खेलमा बुटवलसँग ७० रन तथा दोस्रो खेलमा पोखरा पल्टनसँग ५ विकेटले पराजित भएको थियो ।