काठमाडौं । प्रधानमन्त्री केपी शर्मा ओलीले दसैं लगत्तै सरकारको कार्यशैली परिवर्तन गर्ने मूड बनाएको उनी निकट स्रोतले बताएको छ । 

उक्त स्रोतले शुक्रबार बाह्रखरीलाई जानकारी गराएअनुसार सरकारको कार्यशैलीको ‘ट्रयाक’ बदल्नका लागि उनले केही मन्त्रीलाई हटाउने र अहिले विभिन्न मन्त्रालय लिइरहेकाहरुलाई पनि हेरफेर गर्ने मनस्थिती बनाएका छन् । 

मन्त्रिमण्डल हेरफेरका क्रममा प्रधनमन्त्री ओली विवादमा आएका र चित्त बुझ्दो काम गर्न नसकेका मन्त्रीहरु हटाउने तयारीमा रहेको स्रोतले बताएको छ । 

‘बा’ भन्ने प्रति अनुदार

२०६२/६३ को आन्दोलनपछि पार्टीमा युवाहरुको एउटा पुस्ताले ओलीलाई ‘बा’ भन्ने गरेको तर्फपनि प्रधानमन्त्री असन्तुष्ट रहेको बुझिएको छ । उनले त्यसो नभन भनेर कसैलाई निर्देशन नदिए पनि उनीहरुलाई त्यति प्राथमिकतामा पार्न छोडेको स्रोतले बताएको छ । पहिला नेकपा एमालेमा रहेका ती युवाहरुले आपसमा कुरा गर्दा ‘ओली बा’ भन्ने गरेको बुझिएको छ । “ओली बा भन्नेले एकताका बालुवाटार कब्जामा लिन खोजेपनि अब प्रधानमन्त्रीले माइनस गर्दै हुनुहुन्छ” स्रोतले भन्यो ।

महेश बस्नेतसँग रुष्ट

प्रधानमन्त्री निकट मानिने युवा नेता महेश बस्नेतले मन्त्रीमण्डल चाँडै हेरफेर गरिने भनेर केही दिन अघि एउटा सार्वजनिक कार्यक्रममा बोलेकोमा प्रधानमन्त्री असन्तुष्ट भएका छन् । 

विहीबार गृहजिल्ला झापा गएका उनले कार्यकर्ताहरुसँगको कुराकानीमा त्यो असन्तुष्टि पोखेका थिए । त्यस्तो कुरा पार्टीका अर्का अध्यक्ष पुष्पकमल दाहाल वा महासचिव विष्णु पौडेल सम्मले भनेको भए सुहाउने तर बस्नेतले जथाभावी बोलेको भनेर प्रधानमन्त्री असन्तुष्ट बनेका हुन् ।

आफ्ना होइन अब विज्ञ

प्रधानमन्त्री ओलीले अब राजदूत लगायतका राष्ट्रिय महत्वका नियुक्तिमा आफ्ना दलका सदस्यलाई मात्रै होइन कुरा बुझेका विज्ञलाई नियुक्त गर्ने तयारी थाल्न आफू निकट नेताहरुलाई भनेका छन् । “दसैंंपछि साँच्चै देश बनाउने अठोटका साथ उहाँले आफ्नो कार्यशैलीको ट्रयाक बदल्न लाग्नु भएको छ,” उनी निकट स्रोतले भन्यो ।