म्याग्दी । एक व्यक्तिको निजी लगानीमा जलजला गाउँपालिका–३ स्थित ऐतिहासिक मल्लाज कोत भगवती मन्दिरको पुनःनिर्माण भएको छ । काठमाडौंको ताहचलका शिवकुमार श्रेष्ठले दिवङ्गत बुवा बाबुलाल र आमा बालकुमारी श्रेष्ठको स्मृतिमा मन्दिर पुननिर्माण गरेका हुन् ।
श्रेष्ठको रु ३६ लाख सहयोगमा बाइसे÷चौबिसे राज्यका पालामा निर्मित ऐतिहासिक मन्दिरको पुनःनिर्माण गरिएको मल्लाज कोत पूजा व्यवस्थापन समितिका अध्यक्ष डम्मरबहादुर जिसीले जानकारी दिए । आफ्नो जन्मथलोको ऐतिहासिक, धार्मिकस्थल जीर्ण बनेपछि स्थानीयवासीले गरेको अनुरोधअनुसार पुनःनिर्माणमा सहयोग गरेको श्रेष्ठले बताए ।
श्रेष्ठले मन्दिर पुनःनिर्माणका लागि विसं २०७२ मा सञ्चालन भएको महायज्ञमा सहयोगको घोषणा गरेका थिए । महायज्ञबाट सङ्कलित रकमबाट रु एक करोड ४० लाखको लागतमा मन्दिर परिसरमा पूजास्थल, भवन निर्माण र कोत परिसरको खेलमैदान विस्तार गरी प्याराफिट बनाइएको छ । मन्दिरको प्रवेशद्वार नजीकै एक जोडी बाघको शालिक बनाइएको मल्लाज भगवती कोत मन्दिर पुनःनिर्माण समितिका अध्यक्ष टेकबहादुर जिसीले बताए ।
करिब ५०० वर्ष पुरानो कोत मन्दिर बाइसे÷चौबीसे राज्यका पालामा तत्कालीन मल्लाज राज्यका राजाले पूजाआजाका लागि निर्माण गरेका थिए । कोत मन्दिरको जीर्णोद्धार गरी नयाँ संरचना निर्माण भएपछि पूजा व्यवस्थापनमा सहज हुनुका साथै मन्दिरको धार्मिक पर्यटन प्रर्वद्धनमा सहयोग मिलेको वडाध्यक्ष रवि भण्डारीले बताए । रासस