काठमाडौं । खेलाडीलाई चाडपर्व मनाउने अवसर कमै जुर्छ । खेलका दौरान कहिले विदेशत कहिले स्वदेशमै भएपनि घर जाने अवसर जुर्दैन । कहिले अन्तर्राष्ट्रिय प्रतियोगिताको तयारीले ढुक्कसँग दसैं मनाउन पाउँदैनन् खेलाडीले ।
यो वर्ष भने स्थिति अलि फरक छ । क्रिकेट खेलाडीहरु आइसीसी ट्वान्टी–२० विश्वकप छनोट अन्तर्गतएशिया छनोट समूह बीको विजेता बनेर फर्किएका छन् भने फुटबल खेलाडी लिग खेलिरहेका छन् । दसैंतिहारसम्म लिग स्थगित भएकाले फुटबल खेलाडी ढुक्क छन् । भलिबल खेलाडीको पनि तत्काललाई कुनै प्रतियोगिता नरहेकाले ढुक्कसँग दसैं मनाउँदैछन् । हामीले बिभिन्न खेलमा केही खेलाडीको दशैं योजना तयार पारेका छौं ।
नेपाली राष्ट्रिय क्रिकेट टोलीका कप्तान पारस खड्का बानेश्वरस्थित आफ्नो घरमा घरपरिवारसँगै बसेर दसैं मनाउने योजनामा छन् । उनले भने, “घरपरिवारसँग घरमै टीका लगाएर रमाइलो गर्ने योजना छ । साथीभाइसँग यतै बसेर रमाइलो गर्छु ।”
नेपाली राष्ट्रिय फुटबल टोलीका कप्तान विराज महर्जन काठमाडौंमै जन्मे अनि यतै हुर्के । उनको हरेक दसंै काठमाडौंमै बित्छ । “काठमाडौं बाहिरका धेरै साथी छन् तर प्रायः दसैंमा घर जान्छन् । आफ्नो रमाइलो घरपरिवारसँगै हो,” कप्तान विराजले भने ।
भलिबल टोलीका उपकप्तान मानबहादुर श्रेष्ठ यो वर्षको दसैंलाई घुमघाममा केन्द्रित गरेका छन् । हालै हङकङबाट फर्किएका उनी पोखरामा घुमेर घर नवलपरासी पुगेका छन् । “पोखरामा रहेका आफन्तजन र पोखरा घुमेर घर पुगेको छु अब लुम्बिनी घुम्ने योजना छ,” उनले भने, “ गुरु, साथीभाइलाई भेटेर रमाइलो गर्छु ।”
राष्ट्रिय फुटबल टोलीका खेलाडी तथा नेपाल पुलिस क्लबका कप्तान भोला सिलवाल दसैं मनाउन काठमाडौंबाट विराटनगर पुगिसकेका छन् । धेरैपछि दसैं मनाउन घर पुगेका उनी आफन्तजनसँगै दसैं विशेष बनाउने योजनामा छन् । “घरनजिककै रहेको कालीमन्दिरमा नवरात्रीसम्मविशेष पूजापाठ हुन्छ । त्यहि गएर रमाइलो गर्छौं,” उनले भने, “टीकाको दिन बुवाआमाको हातबाट टीका लगाएपछि अन्य आफन्तबाट आशिर्वाद लिन्छौं ।”
नेपाली राष्ट्रिय फुटबल टोलीका गोलकिपर विकेश कुथुको घर सिन्धुपाल्चोक हो । तर यो वर्षको दसैं भने विकेश काठमाडाैंमै मनाउँदै छन् । “सबै परिवारका सदस्य हामी काठमाडाैंमा नै छौं । त्यही भएर यतै मनाउने सोचमा छु । मान्यजनबाट टीका ग्रहण गर्ने अनि परिवारबीच रमाइलो गरेर दसैं मनाइन्छ ।”
ओलम्पीयन दीपक बिष्ट यो वर्षको दसैं पुख्र्यौली थलो डडेलधुरामा मनाउने योजनाका साथ डडेलधुुरा हिँडिसकेका छन् । पटक—पटक डडेलधुरा पुुगेपनि दसैं मनाउनकै लागि भने बिष्ट ७—८ वर्षपछिमात्रै गाउँ फर्किएको उनले बतचाएइ । छोरा भएपछि पहिलो पटक गाउँ जान लागेका बिष्टले यो वर्ष गाउँमा कुुल देवताको पूजासमेत गर्ने योजना बनाएका छन् ।डडेलधुुरामा पारिवारिक जमघट हुने भएकाले परिवारसँग बसेर दसैंको रमाइलो गर्ने बिष्टले बताए ।
भलिबल खेलाडी मजु गुरुङ कास्कीको माछापुच्छे« गाउँपालिकामा रहेको मामाघर जाने तयारीमा छन् । उनले भनिन्, “गाउँ जान्छु, मामाघरमा टीका लगाउने योजनामा छु ।”
नेपाली राष्ट्रिय फुटबल टोलीकी पूर्वकप्तान अनु लामा काठमाडौंमै दसैं मनाउँदैछिन् । दायाँ घुँडाको शल्यक्रिया भएको दुईवर्षपछि मैदान पुगेकी अनु साथीहरुसँग रमाइलो गर्ने योजनमा छन् । नेपाली महिला फुटबल टोली दसैंलगत्तै चीन भ्रमणमा जाँदैछ । टोलीमा नपरेकी अनु लयमा फर्किने कोसिसमा नियमित अभ्यासमा छन् ।
नेपाल राष्ट्रिय ब्याडमिन्टन टोलीकी खेलाडी नविता श्रेष्ठले काठमाडौंमै मनाउने योजना रहेको बताइन् ।“घरमै नातेदार बोलाएर टीका लगाएर दसैं मनाउँछु । यसपालि दसैं काठमाडौंमै मनाउने योजना छ । घरपरिवार र साथीहरुसँग तास खेल्दै दसैं मनाउँछु,” उनले भने ।
नेपाल ब्याडमिन्टन खेलका हस्ती शिव सुन्दर गोथेको दसैं योजना सामान्य छ । उनले भने, “मेरो दसैं काठमाडौंमै घरपरिवारसँग बसेर रमाइलो गर्ने योजना छ । तर, दशमीपछि साथीहरुसँग काठमाडौं बाहिर जान सक्नेसम्भावना पनि छ ।”