ललितपुर । कथाकार सुषमा मानन्धरको लघुकथा संग्रह ‘अनावरण’को शनिबार ललितपुरमा आयोजित एक कार्यक्रमका बीच लोकार्पण गरियो । २४ लघुकथाहरुको संगालो ‘अनावरण’लाई छ जना स्रष्टाहरुले संयुक्तरुपमा लोकार्पण गरे । 

पेन नेपालद्वारा आयोजित लोकार्पण समारोहमा साहित्यकार हास्य व्यँग्यकार रामकुमार पाँडे, बालकथाकार विनय कसजु, लघुकथा समाजका अध्यक्ष श्रीओम श्रेष्ठ रोदन, समालोचक दामोदर पुडासैनी, स्विट्जल्याण्ड पेनका सचिव एलिक्स प्यारोडी तथा लेखक सुषमा मानन्धरले संयुक्तरुपमा लोकार्पण गरेका थिए । 

कार्यक्रममा दामोदर पुडासैनीले ‘अनावरण’ लघुकथा संहग्रहले काठमाडौं उपत्यकाको आञ्चलिकता चित्रण गरेको उल्लेख गरे । उनले कृतिले समसामयिक परिवेश, नेपाली प्रशासनिक क्षेत्रमा रहेर काम गर्ने मानिसहरुको मनोविश्लेषण पनि गरेको बताए । 

कथाकार मानन्धरले आफ्नै परिवेश, भोगाई र जानकारीका आधारमा कथा सिर्जना गरेको बताईन् । पेन नेपालका महासचिव प्रकाश ए राज, सदस्य कोमल चित्रकार, स्वीट्जरल्याण्ड पेनका सचिव एलिक्स प्यारोडीले पनि आफ्ना धारणा राखेका थिए ।