काठमाडौं । ‘एक एक पाइला’ अभियानले डोल्पामा स्वास्थ्य शिविर सञ्चालन गरेको छ । गतसाता भएको शिविरमा २ हजार बढी बिरामीको उपचार गरिएको अभियानका एक सदस्य डा. सुधांशु केसीले जानकारी दिए ।
यो १७ औं अभियान हो । यसअघि विभिन्न १६ स्थानमा यस्ता शिविर सञ्चालनमा आइसकेका छन् ।

“हामीले भूकम्पबाट प्रभावित जिल्लाहरुमा सहयोग पुर्याउन लागि यो अभियान सुरु गरेका थियौं । सिन्धुपाल्चोकको चनौटेबाट सुरु गरेर गोरखाको घ्याचोकसम्म हामीले शिविर सञ्चालन गरिसकेका छौं,” डा. केसीले बाह्रखरीसँगको कुराकानीमा भने, “भूकम्पलगत्तै सुरु भएको यो अभियान जारी छ ।”

भूकम्प प्रभावित जिल्लाहरुपछि यो अभियानलाई कर्णालीका जिल्लाहरुमा निरन्तरता दिइएको उनले बताए । अभियानका अनुसार डोल्पामा गत साता भएको शिविरमा २ हजार ४ जनाको उपचार गरिएको छ ।

“हाम्रो यो १७ औं पाइला हो,” डा. केसीले भने, “मुख्यतः हामीले त्यहाँ दमका बिरामी बढी भेट्यौं । युवावस्थामै चुरोटको लतमा परेकाले दमका बिरामी बढी भेटिएको हुन सक्छ । त्यसबाहेक कर्णालीकै अन्य जिल्लाको तुलनामा ब्लड प्रेसर, पाठेघरको समस्या, हाडजोर्नी र हेपाटाइटिसका बिरामी पनि बढी भेटियो ।”

शिविरमा लाग्ने खर्च अभियानकै सदस्यहरुबाट संकलन गरिएको थियो । त्यसमा वार्षिक सदस्य बन्नका लागि ५ हजार रुपैयाँ संकलन गर्नुपर्ने हुन्छ ।  अभियानले यसअघि मुगु, जुम्ला, हुम्ला र डोल्पामा पनि शिविर सञ्चालन गरिसकेको छ । शिविर सञ्चालनका लागि १९ जना चिकित्सकसहित ४२ जनाको टोली डोल्पा पुगेको थियो । 

“हामीले विदेशी निकायबाट सहयोग लिएर शिविर सञ्चालन गरेका होइनौं,” डा. केसीले भने, “हामी आफ्नैको पहलमा गरिएको अभियान हो । यसमा केही विदेशमा बस्ने नेपालीले भने सहयोग गर्नुभएको छ भने यसको खर्चका लागि डा. सुमन थापा (अभियानकै सदस्य) नेतृत्वमा रहेको ब्लु फ्रेट ब्याण्डले कार्यक्रम गरेर पनि रकम संलकन गर्ने काम भइरहेको छ ।”