Skip Advt.

एम्बाप्पेले गरे अन्तिम समयमा गोल, आइसल्यान्डसँग बराबरी

एम्बाप्पेले गरे अन्तिम समयमा गोल, आइसल्यान्डसँग बराबरी

एजेन्सी । वैकल्पिक खेलाडी केलियन एमबाप्पेले अन्तिम समयमा गरेको गोलमा विश्व विजेता फ्रान्सले आइसल्यान्डसँग २–२ को बराबरी खेलेको छ ।

दुई शुन्यले पछि परेको अवस्थामा फ्रान्सले उत्कृष्ट पुनरागमन गरेको हो । एमबाप्पे ६०औं मिनेटमा मैदान प्रवेश गरेका थिए । पिएसजीका फरवार्ड एमबाप्पेले ८६औं मिनेटमा हानेको प्रहार आइसल्यान्डका गोलकिपर रनर एलेक्स रनर्सनले राम्रो नियन्त्रणमा लिन सकक्दा रक्षक होल्मार ओर्न इजोलफसनलाई लागेर गोलमा परिणत भएको थियो । अन्तिम मिनेट १९ वर्षे एमबाप्पले पेनाल्टीमा गोल गरेपछि फ्रान्स बराबरी गर्न सफल भएको हो ।

विरकरि विजर्नासनको गोलमा आइसल्यान्डले ३०औं मिनेटमा अग्रता लिएका थिए भने ५८औं मिनेटमा करी एन्डरसनले अग्रता दोब्बर पारेका थिए । भ्रमणकारी आइसल्यान्डले यसअघिका ९ खेलमा पनि जित निकाल्न सकेको थिएन । नेसन्स लिगमा आइसल्यान्ड स्विट्जरल्यान्ड र बेल्जियमसँग पराजित भएको थियो । २०१६ को युरो कपको क्वार्टरफाइनलमा आइसल्यान्ड फ्रान्ससँग ५–२ ले पराजित भएको थियो । यसअघिका १२ खेलमा आइसल्यान्डले फ्रान्सलाई हराउन सकेको छैन ।

कम बल पोसेसनका बाबजुद पनि भ्रमणकारी आइसल्यान्डले फ्रान्सलाई हराउने संकेत गरेको थियो । तर ६०औं मिनेटमा मैदान छिरेका एमबाप्पे नायक बनेपछि आइसल्यान्डका जित्ने सपना पूरा हुन सकेन । यससँगै फ्रान्सले अपराजित यात्रालाई १३ खेलसम्म लम्ब्याएको छ ।
 

प्रतिकृया दिनुहोस