काठमाडौं । अजित भण्डारीको निर्णायक गोलमा विभागीय क्लब नेपाल पुलिसले सहिद स्मारक ए डिभिजन लिगमा विजयी सुरुवात गरेको छ । आफ्नो पहिलो खेलमा जावलाखेल युथ क्लबलाई १–० ले हराउँदै पुलिसले विजयी सुरुवात गरेको हो । जितसँगै पहिलो खेलमा स्पस्ट तीन अंक लिने पुलिस क्लब तेस्रो टोली बनेको छ । यसअघि संकटा र थ्री स्टारले तीन अंक बटुलेको थियो । सातोबाटोस्थित एन्फा कम्प्लेक्समा भएको खेलमा पुलिसले खेलको ३१ औं मिनेटमा अग्रता लिएको थियो । 

तेज तामाङको क्रसलाई अजितले पोष्टको दिशा दिएका थिए । ओलालेकन अफिज लवालले सुमन लामालाई लडाएपछि पुलिस क्लबले फ्री किक पाएको थियो । फ्री किकमा सुमनले सँगै रहेका तेजलाई पास दिए । तेजले थोरै अगाडि बढाएर गरेको क्रसमा अजितले गोल गरेका हुन् । 

७५औं मिनेटमा ‘वान भर्सेज वान’ को स्थितिमा बैकल्पिक खेलाडी प्रज्वल थापामगरले पेनाल्टी क्षेत्रबाट हानेको प्रहार पुलिसका गोलकिपर शत्रुधन चौधरीले बचाइदिएपछि जावलाखेल बराबरी गर्नबाट चुक्यो । 

त्यसअघि पनि पुलिस क्लबले गोलको केही राम्रा अबसर सिर्जना गरेको थियो । पुलिसले सातौं मिनेटमा सुमन लामाको फ्री किक थोरैले बाहिरिएको थियो । त्यसको तीन मिनेट बित्न नपाउँदै सन्तोष हेमरूनको क्रसमा अभिषेक रिजालले बक्सभित्रबाट गरेको हेडले पनि पोष्टको दिशा लिन सकेन । २०औं सन्तोष हेमरूनले हानेको प्रहार जावलाखेलका गोलकिपर टेकेन्द्र थापाले मुस्किलले बचाएका थिए ।