काठमाडौं । प्रधानमन्त्री केपी शर्मा ओलीले अपराध अनुसन्धानमा नेपाल प्रहरीले खेलेको भूमिकाको प्रशंसा गरेका छन् । ६३ औं प्रहरी दिवसका अवसरमा प्रहरी प्रधान कार्यालय नक्सालमा आयोजित कार्यक्रममा ओलीले प्रहरीको प्रशंसा गरेका हुन । 

प्रधानमन्त्री ओलीले नेपाल प्रहरी अपराध नियन्त्रण तथा अनुसन्धानको क्षेत्रमा अब्बल रहेको र यस साखलाई कायम राखी नागरिक केन्द्रीत प्रहरी सेवा प्रवाह गर्न अझ बढी व्यावसायिकता प्रदर्शन आवश्यक रहेको बताए । 

‘‘आमनागरिकलाई सेवा प्रवाह गर्न नेपाल प्रहरी अग्रपङ्तिमा हुन्छ ।  नागरिकको घरदैलोमा जति छिट्टो प्रहरी पुग्न सक्यो त्यति नै सरकारको प्रभावकारिता देखिन्छ,’’ प्रधानमन्त्री ओलीले भने । सीमित श्रोत साधनका बाबजुद नेपाल प्रहरीले आन्तरिक सुरक्षा कायम राख्न प्रदर्शन गरेको ढृढता, कर्तव्यनिष्ठा र वीरताको प्रशंसा  पनि प्रधानमन्त्री ओलीले गरे । 

प्रविधिको दुरुपयोगबाट हुने अपराध, अन्तरदेशीय अपराध, आतंकवाद जस्ता सुरक्षा चुनौति दिन प्रतिदिन नयाँ स्वरुपमा वृद्धि भइरहेकोतर्फ प्रधानमन्त्री ओलीले प्रहरीलाई सचेत भएर आवश्यक चाल्न निर्देशन समेत दिए । कार्यक्रममा प्रहरी महानिरीक्षक (आइजीपी) सर्वेन्द्र खनालले प्रहरीको व्यावसायिकता र प्रभावकारी कानून कार्यान्वयनबाट कानुनी शासनको प्रत्याभूति भई आमनागरिककमा शान्ति सुरक्षाको महसुस हुने बताए । खनालले भने, ‘‘ नेपाल प्रहरी नै अपराध अनुसन्धानका दृष्टिले विज्ञहरुको संगठन हो । नेपाल प्रहरीलाई प्रहरी मध्येकै नमुना संगठन र सुशासनको पहरेदारको रुपमा रुपान्तरण गरिन्छ । विभिन्न कालखण्डमा घटित जटिल अपराधको सफल अनुसन्धानले आमजनको भरोसा पाउन सफल नेपाल प्रहरी हरेक सबै अपराधको अनुसन्धान गर्न सक्षम छ ।’’ 

उच्च व्यावसायिक निष्ठा र इमान्दारिताका साथ भावी कार्ययोजना तयार गरी प्रहरी संगठन अगाडी बढेको खनालको भनाई छ ।