काठमाडौं । लामो समयपछि लिग हुन लागेका कारण उपाधि दाबेदार थ्री स्टार क्लबका प्रशिक्षक मेघराज केसीले बिहीबार हुने सहिद स्मारक ‘ए’ डिभिजन लिगमा फ्रेण्ड्सविरुद्धको पहिलो खेलमा दोस्रो हाफपछिमात्र रणनीति बनाउने बताएका छन् ।
चारपटक लिगको उपाधि जितिसकेको थ्री स्टारले फ्रेण्ड्स क्लबविरुद्धको खेलबाट नयाँ सिजनको सुरुआत गर्दैछ । अखिल नेपाल फुटबल संघ (एन्फा) को आन्तरिक विवादका कारण बीचमा लिग अवरुद्ध बनेको थियो । पाँच वर्षपछि लिग हुन लागेका कारण कुन टोली कस्तो छ भनेर भन्न गाह्रो हुने प्रशिक्षक केसीले बताए ।
“लामो समयपछि लिग हुन लागेकाले कुन टोलीको अवस्था कस्तो छ भन्ने हामीलाई थाहा छैन । त्यसैले फ्रेण्ड्स क्लबबारे पनि हामी जानकार छैनौं,” बिहीबारको खेलबारे थ्री स्टारका प्रशिक्षक केसीले भने, “पहिलो हाफ हामी उनीहरुको रणनीति अध्ययन गरेर दोस्रो हाफमा आफ्नो रणनीति बनाउने छौं । तथापी दर्शकको अपेक्षाअनुसार थ्री स्टारले खेल्नेछ ।”
लिगमा सहभागी टोलीमध्ये अधिकांस क्लबले प्रतियोगिताको अघि मात्र टिम बनाएको छ । तर थ्री स्टारलगायत औलामा गन्न सकिने केही क्लबले मात्र नियमित खेलाडी अनुबन्ध गरेर राखेका थिए । आफ्नो टोलीमा खेलाडीबीच राम्रो तालमेल गरेका कारण उपाधि जित्ने दाबी गर्दै प्रशिक्षक केसीले थपे, “कतिपय क्लबले एक दुई महिना अघिबाट मात्र तयारी थालेका छन् । तर हामी दश महिनाअघिबाट तयारी गरिरहेका छौं । हाम्रो टिमवर्क राम्रो छ । विदेशी खेलाडीसँगको तालमेल पनि उत्कृष्ट छ । फुटबलमा कुनै पनि टोलीलाई कमजोर र बलियो भन्ने हुदैन । तर हामी पहिलो खेल जित्दै लिगमा सुखद सुरुआत गर्ने प्रसासमा हुन्छौं । पहिलो खेल जित्दा टोलीको मनोबलमा धेरै फरक पर्छ त्यसैले पनि हामी स्पष्ट तीन अंकका लागि खेल्नेछौं ।”
थ्री स्टारमा अधिंकाश राष्ट्रिय टोलीका खेलाडी रहेका छन् । अन्तर्राष्ट्रिय खेलको अनुभब बटुलिसकेका पूर्व कप्तान अनिल गुरुङ, निराजन खड्का, अन्नत तामाङ, एलेन न्यौपाने र सुनिल बलको साथ पाएको थ्रिस्टार दुइ बिदेशी खेलाडीको उपस्थितीले थप मजबुद बनेको छ । मोफसलका प्रतियोगितामा उपाधि जिताउन महत्वपुर्ण भुमिका खेल्दै आएका नाइजेरियाका अजाइ मार्टिन्स र पिटर सेगुन थ्रीस्टारका महत्वपूर्ण खेलाडी हुन् ।
खुट्टामा भाचिएका कारण थ्रीस्टारका नियतित कप्तान बिक्रम लामा लामो समयदेखी मैदानमा बाहिर छन् । यही सिजनको लिगबाट पूनरागमन गर्ने योजनामा रहेका विक्रम टोलीसँगै अभ्यास गरिरहेका छन् । तथापी विक्रमले पहिलो खेल खेल्नेमा शंका छ । विक्रम पूर्ण फिट नभइ सकेको र यही सिजन राष्ट्रिय टोलीका कप्तान अनिल टोलीमा अनुबन्ध भएकाले फ्रेन्ड्सविरुद्ध कसलाई कप्तान जिम्मेवारी दिने भनेर टुंगो नलागेको प्रशिक्षक केसीले बताए ।
फेन्ड्समा मोफसलमा खेलेका युवा खेलाडीको बर्चस्व छ । त्यसैले पहिलो खेल नै बलियो टोलीविरुद्ध परेका कारण फ्रेण्ड्सका प्रशिक्षक रमेश महर्जन अंक खोस्ने रणनीतिमा छन् । उनी भन्छन्,“लक्ष्य त जितकै हुनेछ । तर थ्री स्टार बलियो टिम हो । त्यसैले हामी कम्तिमा पनि बराबरी गर्ने योजनामा हुनेछौं । हामीसँग युवा टोली छ । रक्षापंक्ति हाम्रो बलियो पक्ष हो । त्यसको फाइदा उठाउने छौं ।”
प्रशिक्षकको भनाइमा कप्तान धिरज श्रेष्ठ पनि सहमत छन् । उनीले थपे “थ्री स्टारमा अनुभवी खेलाडी छन् । हामी जसरी भए पनि उनीहरुलाई रोक्ने रणनीतीमा हुनेछौं । पहिलो खेलबाट एक अंक खोस्नेछौं ।” फेन्ड्स चार विदेशी खेलाडी अनुबन्ध गर्ने योजनामा छ । त्यसमध्ये दुई खेलाडी अनुबन्धित भइसके पनि दुईको श्रम स्वीकृतीका लागि पहल भइरहेको प्रशिक्षक महर्जनले बताए ।
बंगलादेशका करिम मोहम्मद नुरुल र नाइजेरियाका ओडेह ओलुवासोगो ग्लोरीले थ्री स्टारविरुद्ध खेल्नेछन् । गिनीका सिल्ला सुलेमाने, आइभोरी कोष्टका फोफाना भने श्रम स्वीकृतिको प्रक्रियामा छन् ।