– तनुश्री दत्ता

अहिले बलिउड जगत् १० वर्ष पुरानो विषयले फेरि तातेको छ । सन् २००८ मा अभिनेतृ तथा पूर्व ‘मिस इन्डिया’ तनुश्री दत्ताले अभिनेता नाना पाटेकरसँगै ‘हर्न ओके प्लिज’का निर्माता सामी सिद्दिकी, निर्देशक राकेश सराङमाथि यौन दुव्र्यवहारको आरोप लगाएकी थिइन् । ‘हर्न ओके प्लिज’ छायांकनका बेला नानाले उनीलाई गलत तरिकाले छोएको आरोपले बलिउड तातेको थियो । तर, यो विषयमा केही कारबाही भएन । त्यतिबेलै #MeToo अभियानले गति लिएको थियो । त्यसपछि तनुश्री फिल्मी करिअर छाडेर अमेरिका गइन् र त्यहीँ बस्न थालिन् । दशकपछि उनी फेरि बलिउड फर्किइन् । लगत्तै #MeToo अभियानबारे उनलाई प्रश्न सोधियो । उनले पनि दशक पुरानो कुरा उप्काइन् । अहिले नाना, सिद्दिकी र सराङसँगै कोरियोग्राफर गणेश आचार्यलाई पनि उनले यो घटनामा जोडेकी छन् । त्यसपछि यो विषयमा बहस चलेको चल्यै छ । धेरै कलाकारले तनुश्रीको समर्थनमा वक्तव्य दिइरहेका छन् ।

दुव्र्यवहारको कुरा सञ्चारमा आएपछि ‘आशिक बनाया आपने’ अभिनेतृ तनुश्रीले पत्रकार सम्मेलन गरेर आफ्नो रिस पोखिन् । बलिउडका थुप्रै स्टारको नाम लिँदै उनले यस्ता क्रियाकलाप गर्नेलाई बलिउडबाटै प्रतिबन्ध लगाइनुपर्ने जिकिर गरिन् । 

सन् २००५ को ‘चकलेटः डिप डार्क सेक्रेट्स’का दौरान पनि आफूमाथि यौन दुव्र्यवहार भएको रहस्य पनि उनले खोलिन् । यो फिल्ममा अनिल कपुर, सुनील शेट्टी, इरफान खान, इमरान हासमीको अभिनय थियो । 

भारतको ‘नेसनल काउन्सिल फर विमेन (एनसीडब्लू)’ले बिहीबारमात्रै नाना, गणेश र विवेकविरुद्ध मुद्दा दर्ता गरेको छ ।

‘लुगा खोल र नाच’

‘चकलेट’का निर्देशक विवेक अग्निहोत्रीले मेरो भूमिका नै नभएको सिनमा लुगा खोलेर नाच्न भने । त्यो सिनमा हिरो (इरफान)को मात्रै क्लोज–अप सट थियो । त्यो सिनमा हिरोले खालि एउटा दिशातिर हेरेर भावभंगिमा देखाउनु थियो । विवेकले एक्कासि मतिर हेरेर भने, “जाऊ, लुगा खोलेर नाच ।”

इरफानले तुरुन्ते भने, “मलाई अनुहारको भावभंगिमा देखाउन उनले लुगा खोल्नु पर्दैन ।”

मलाई इरफानप्रति श्रद्धा जाग्यो । निर्देशकको गलत कामलाई उनले सेटमै निस्तेज गरिदिए । त्यतिबेला इरफान भर्खरै बलिउडमा उभिँदै थिए । हल्काफुल्का मात्रै काम गरिरहेका थिए । निर्देशकले दोहो¥याएर लुगा खोल्न अह्राएपछि इरफान पनि जंगिए, “के कुरा गर्नुभएको ? म मेरो क्लोज–अप सट दिन सक्छु । मलाई अभिनय गर्न आउँछ ।”

सुनील शेट्टीज्यू पनि निर्देशकको विरोधमा बोल्नुभयो । उहाँ पनि त्यहीँ हुनुहुन्थ्यो । उहाँले भन्नुभयो, “म आऊँ त अगाडि उभिन ?” त्यसपछि निर्देशक चुप लागे । सुनील र इरफानप्रति मेरो सम्मान अझ बढेर गयो । त्यतिबेला उहाँहरूजस्ता मान्छे हुनुहुन्थ्यो र मैले सामना गर्न सकें । तर, २००८ मा नाना पाटेकरको काण्ड आएपछि मैले सहन सकिनँ ।

मेरो जीवन नर्क बनाइदिए

ममाथि भएको घीनलाग्दो दुव्र्यवहारपछि पनि रजनीकान्त, अक्षय कुमार, शाहिद कपुरजस्ता स्टारहरूले नाना पाटेकर, गणेश आचार्य, निर्माता सामी सिद्दिकीसँग काम गरिरहनुभएको छ । यसले दुव्र्यवहार गर्नेको मनोबल झनै बढ्छ । उनीहरूले मेरो जिन्दगीलाई नर्कजस्तै बनाइदिए । फिल्म उद्योगले अहिलेसम्म उनीहरूलाई केही कारबाही गरेको छैन । एउटी महिलामाथि भएको दुव्र्यवहारसँगै गुन्डा लगाएर आक्रमण गर्ने व्यक्तिहरूलाई कसैले समर्थन गर्नु हुँदैन ।

डरैडरको घर

त्यो घटनापछि मैले डरैडरमा फिल्म उद्योग छाड्नुपर्‍यो । म कस्तो अवस्थाबाट निस्किएँ भन्ने कुरा कसैले कल्पना गर्न सक्दैन । त्यो रात गुन्डाको भीडबाट जोगिएर भागेकी थिएँ म । आमा–बुवा मसँग हुनुहुन्थ्यो । त्यतिबेला नाना पाटेकर र राज ठाकरे घनिष्ट थिए । ठाकरेको बलकै कारण हुनुपर्छ— नानाजस्ता व्यभिचारीलाई फिल्म उद्योगका कुनै पनि संस्थाले औलोसम्म उठाएनन् ।

गुनासो गर्दा वेश्याको आरोप

मैले १० वर्षअघि पनि बोलेकी थिएँ, आज पनि बोल्छु । बारम्बार मलाई आफ्नो कुरा भनिरहन रमाइलो लाग्दैन । अहिले मसँग सबैले यस्तो व्यवहार गरिरहेका छन् कि केही भएकै थिएन, केही भएकै छैन । हाम्रो देशमा महिलाले यौन दुव्र्यवहारसम्बन्धी गुनासो गर्ने हो भने सीधै वेश्या भनेर कलंकित गरिन्छ । र, त्यसपछि विषय पूरै त्यतै मोडिन्छ । महिलाहरूले आफ्ना कुरा खुलेर भन्न सक्ने वातावरण बनाऊँ ।

गुण्डागर्दीको मार

राज ठाकरेजस्ता नालायक नेता आफूलाई लायक सावित गराउन गुण्डागर्दीको सहारा लिन्छन् । राज ठाकरेको पार्टीले पनि त्यही गर्छ । उनको पार्टीमा उनीजस्तै गुण्डाहरू छन् । महिलामाथि आक्रमण गर्नेलाई कसैले आफ्नो नेता बनाउँदैन । तर, नाना पाटेकरलाई हिरो बन्नु थियो, त्यसैले उनको पछि लागे । जति पापड बेले पनि आफ्ना कर्तुतका कारण उनी कहिल्यै हिरो बन्न सकेनन् । चरित्र अभिनेतामै खुम्चिएर बसे ।

नानालाई हिरो बन्नु छ र महिलामाथि गलत व्यवहार गरिरहन्छन् । उनलाई कुनै पनि हिरोइनले भाउ दिँदैनन् । मेरो दुर्भाग्य के भइदियो भने त्यतिबेला त्यो सेटमा उनीसँग म थिएँ । म हुन्थिनँ भने उनले अरु कसैलाई त्यस्तो व्यवहार गर्थे । हिरो त्यो हो, जसले अप्ठ्यारो अवस्थामा महिलाको उद्धार गर्छ । आफूले केही गर्न नसकेपछि गुन्डा पठाएर आतंकित पार्ने नानाजस्ता मान्छेहरू समाजका बोझ हुन् ।

हलिउडमा थुप्रै ओस्कार र अरु सम्मान पाउने ठूला निर्माता/निर्देशक हावी वाइन्स्टाइनलाई उनका गलत क्रियाकलापका कारण सबै मिलेर गलहत्याए । तर, भारतमा नानाजस्ता व्यभिचारीलाई कसैले केही गरेन । ठूला कलाकारको आडमा आफ्नो करियर धकेलिरहेको नानाको आफ्नै केही हैसियत छैन । उनले सजाय पाउनुपर्छ ताकि अबका दिनमा कसैले महिलामाथि दुव्र्यवहार गर्ने आँट नगरोस् । सबैमा भय पैदा होओस् । मैले यो सबै आफ्नो बदला लिनका लागि भनिरहेकी छैन । पछिल्ला १० वर्षमा यो घटना सम्झी–सम्झी मैले धेरै पटक दाह्रा किटेकी छु । आफैंसँग हारेर डिप्रेसनजस्तो अनुभव गरेकी छु । मेरो पूरै करियर बर्बाद भएको छ ।