एजेन्सी,लण्डन । इन्टरनेसनल च्याम्पियन कप अन्तर्गत प्रिमियर लिग च्याम्पियन लेष्टर सिटीले स्कटिस च्याम्पियन सेल्टिकलाई पराजित गरेको छ । शनिबार राति भएको खेलमा लेष्टरले सेल्टिकलाई ट्राइबेकरमा ६–५ ले पराजित गरेको हो ।

सेल्टिकको घरेलु मैदानमा भएको खेल निर्धा्रित समय १–१ को बराबरीमा सकिएपछि खेलको निर्णय टाइब्रेकरबाट लिइएको थियो । पहिलो हाफमा गोलरहित बराबरी भएको खेलको दोस्रो हाफमा भने लेष्टरले सुरुवाती अग्रता लिएको थियो । दोस्रो हाफको सुरुमै रियाद महरेजले गोल गर्दै लेष्टरलाई १–० को अग्रता दिलाए । तर, खेलको ५९ औं मिनेटमा सेल्टिकका ओअनो कोनलले बराबरी गोल फर्काएपछि खेल ट्राइबेकरतर्फ मोडिएको थियो । ट्राइब्रेकरमा भने लेष्टरले सेल्टिकलाई ६–५ ले हरायो । 

इंगलिस प्रिमियर लिग लगायत युरोपियन लिगहरुको नयाँ सिजन अघि क्लबहरु तयारी स्वरूप मैत्रीपूर्ण खेल खेलिरहेका छन् । लेष्टरले आउने बुधबार अस्टियना फुटबल क्लबसंग मैत्रीपूर्ण खेल खेल्ने छ । त्यस्तै सेल्टिक भने च्याम्पियन्स लिग तयारीका लागि अर्को हप्ता काजकिस्तान जाने छ ।