काठमाडौं । विभिन्न बैंकले ब्याजमा मिलेमतो गरेपछि नेपाल राष्ट्र बैंकबाट स्ट्यान्डर्ड चार्टर्ड बैंकले मात्र राष्ट्र बैंकको ऋणपत्र खरिद गरेको छ ।
स्टयान्डर्डले १ अर्ब ५३ करोड रुपैयाँ पाएको छ ।
बैंकहरुले लगानीयोग्य पुँजी (तरलता) नभएपछि थप लगानी गर्न नपाएको गुनासो गरेपछि राष्ट्र बैंकले मंगलबार ४० अर्ब रुपैयाँ बराबरको सोझै खरिद गर्नेगरी ऋणपत्र निष्कासन गरेको थियो ।
विभिन्न बैंकले ९ अर्ब ५६ करोड रुपैयाँ बराबरको प्रस्ताव गरेकोमा अन्तमा स्ट्यान्डर्डले मात्र पाएको राष्ट्र बैंकका प्रवक्ता नारायणप्रसाद पौड्याले बताए । “बैंकहरुले मिलेमतोमा न्युन ब्याजदर प्रस्ताव गरेपछि यस्तो अवस्था आएको हो,” उनले भने ।
अधिकांश बैंकले औसत २ प्रतिशत ब्याजमा ‘विड’ गरेका थिए ।
राष्ट्र बैंकले निष्कासन गरेको ४० अर्ब रुपैयाँको ऋणपत्रले कर्जा लगानी (सीडी रेसियो) कायम गर्न नभई नगद प्रवाहका लागि मात्र भएको सानिमा बैंकका प्रमुख कार्यकारी अधिकृत भुवन दाहाल बताउँछन् ।
“ऋणपत्रको रकम लगानी गर्न नपाउने अवस्था आएपछि बैंकले चासो नदेखाएको हुन सक्छन्,” उनले भने, “हामीलाई चाहिएको थप रकम लगानी गर्नका लागि हो । यो ऋणपत्रबाट पूरा नहुने देखियो ।”
राष्ट्र बैंकले निष्कासन गरेको ऋणपत्र नगद प्रवाह (सीआर) कायम गर्नका लागि मात्र भएको उनको भनाई छ । “हामीले राष्ट्र बैंकसँग थप कर्जा लगानी गर्नका लागि रकम मागेका हौं,” उनले भने ।
दुई साताअघि राष्ट्र बैंकले तरलता व्यवस्थापन गर्नका लागि भन्दै २ पटक गरेर ३० अर्ब रुपैयाँ बराबरको रिपो ल्याएकोमा बैंकले सहभागिता जनाएनन् ।