काठमाडौं । ‘अहिले नगरे कहिले गर्ने अनि हामी युवाले नगरे कसले गर्ने ?’ भन्ने सवाल बोकेको नेपाली चलचित्र ‘बिजुली मसिन’ आगामी भदौ ३१ मा रिलिज हुँदैछ । 

साइन्स फिक्सन विधाअन्तर्गत पर्ने यो चलचित्र वर्तमान युगमा  विज्ञान र प्रविधिले आममानिसमा पुर्याएको प्रभावका विषयमा आधारित छ । ‘बिजुली मसिन’ विश्व नै विज्ञान प्रविधिले चलाइरहेका बेला नेपालमा यसको प्रभाव कस्तो छ भन्ने विषयमा अध्ययन गरिरहेका युवाको समूहद्वारा तयार पारिएको चलचित्र हो ।  

युवाहरूको सहभागितामा निर्मित ‘बिजुली मसिन’का निर्देशक २९ वर्षीय नवीन अवाल हुन् । उनी साइन्सका विद्यार्थी हुन् । उनले थुप्रै सर्ट मुभी पनि बनाइसकेका छन् । नेपालमा जारी ऊर्जा संकट तथा त्यसले रोजगार, शिक्षा एवं आममानिसको दैनिक जीवनमा पारिरहेको असरका साथै पछिल्लो पुस्ता विज्ञान र प्रविधिजस्ता विषयमा आकर्षित भइरहेको भए पनि शून्य सफलता हात लागेको र युवा शक्तिको ऊर्जा खेर गइरहेको विषयलाई चलचित्रमा उतारिएको छ । 

चलचित्र उत्पादनमा ऋषभ आचार्य, सन्तोष लामिछाने, सञ्जीव न्यौपाने तथा दिपेन बस्नेतको सहभागिता छ । नायिका रेलिजा श्रेष्ठ यही चलचित्रमार्फत् डेब्यु गर्दैछिन् । नायकको भूमिकामा अभिषेक सुवेदी र जीवन अधिकारी छन् । 

नेपालमै पहिलो पटक साइन्स फिक्सन विधामा प्रस्तुत हुन लागेको ‘बिजुली मसिन’ युवाले छुटाउनै नहुने चलचित्र भएको निर्माण पक्षको दाबी छ । युवा पुस्ताले आफ्नो ऊर्जा देशको संकटमा प्रयोग गर्न सक्छन् भन्ने सन्देश चलचित्रमा छ । कथावस्तु र प्रस्तुति नयाँ शैलीको भएकाले पनि चलचित्र चल्नेमा निर्माता तथा निर्देशक विश्वस्त छन् ।