काठमाडौँ । लामो समयबाट रोकिएको महिला राष्ट्रिय क्रिकेट प्रतियोगिता शनिबारबाट राजधानीमा सुरु हुँदैछ । र, तीन दिन संचालन हुने प्रतियोगिताको सम्पूर्ण तयारी पूरा भएको आयोजक राष्ट्रिय खेलकुद परिसद (राखेप) ले जनाएको छ । 

शुक्रबार राजधानीमा एक पत्रकार सम्मेलन गर्दै साउन ११ गतेसम्म कीर्तिपुरस्थित त्रिवि क्रिकेट मैदानमा हुने प्रतियोगिताको तयारी सकिएको प्रतियोगिता संयोजक तथा राखेप सदस्य शैलेष कर्माचार्यले जानकारी दिए । टि–२० फम्र्याटमा सञ्चालन हुने प्रतियोगितामा पाँच बिकास क्षेत्र र सशस्त्र प्रहरी बल(एपिएफ) को महिला टोली सहित ६ टिमले सहभागिता जनाउने कर्माचार्यले जानकारी दिए ।

प्रतियोगितामा सहभागी टोलीलाई दूई समुहमा टिम बिभाजन गरि लिगका आधारमा खेलाइने छ । र, शीर्ष दुई टिम फाइनलमा प्रतिस्पर्धा गर्नेछन् । यस राष्ट्रिय प्रतियोगिताका लागि राखेपले असार २८ गते २२ जिल्ला तथा ३० र ३१ गते क्षेत्रीय टोलीको छनोट पाँचै बिकास क्षेत्रको क्षेत्रिय खेलकूद बिकास समितिको आयोजनामा खेलाडी छनोट गरेको थियो ।

सिनियर महिला क्रिकेटको इतिहासमै पहिलो पटक बिजेता टिमले नगद १ लाख तथा उपविजेताले ५० हजार प्राप्त गर्नेछन् । यस्तै प्रतियोगिताको उत्कृष्ट खेलाडी, उत्कृष्ट ब्याट्सवूमन, उत्कृष्ट बलर, उदयमान खेलाडी आदि बिधामा पनि पुरस्कृत गरिनेछ ।

राष्ट्रिय खेलकुद परिषद(राखेप)को आयोजनामा दुईवर्षपछि राष्ट्रिय महिला क्रिकेट प्रतियोगिता हुन् लागेको हो । दक्षिण कोरियामा भएको सन् २०१४ मा भएको इन्चोन एसियाडपछि नेपाली टोलीले कुनै पनि अन्तराष्ट्रिय खेल खेलेको छैन । त्यस्तै घरेलु लिग तथा प्रतियोगिता भएको छैन ।

तर, यस प्रतियोगितालाई आइसीसी महिला विश्वकप छनोट २०१६ को लागि खेलाडी छनोटको रुपमा हेरिएको छ । प्रतियोगिताबाट २४ उत्कृष्ट खेलाडी छनोट गरी श्रावणको अन्तिमबाट बन्द प्रशिक्षणमा राखिने राखेपले जनाएको छ । खेलाडी छनोट नेपाली राष्ट्रिय टोलीका प्रशिक्षक जगत टमाटा, श्यामसन जंग थापा, सुदिप पौडेल, अरुण अर्याल र विनायक पोखरेल रहेका छन् । तर, विश्वकप छनोटका लागि १४ सदस्यीय टोली भने अन्तर्राष्ट्रिय क्रिकेट परिसद आइसीसीका प्रतिनिधीसहितको छनोट समितिले गर्ने राखेपले जनाएको छ ।

इंग्ल्यान्डमा अर्को वर्ष हुने आईसीसी महिला विश्वकप क्रिकेटको एसियाली छनोटमा नेपालले हङकङ, चीन र थाइल्याण्डसंँग प्रतिस्पर्धा गर्ने छ । नेपाल सम्मलित एसियाली छनोटको आयोजना हङकङमा आगामी अक्टोबरमा हुनेछ । एसियाली छनौटमा आयोजक हङकङसँगै नेपाल, चीन र थाइल्याण्डले राउण्ड रोबिनका आधारमा खेल्नेछन् । आईसीसीले छनोट खेल अक्टोबर ९ देखि १५ मा हुने जनाएको छ ।