अर्थ व्यवसाय
काठमाडौँ । सेयर बजार अनपेक्षित रुपमा बढ्न थालेपछि नेपाल धितोपत्र बोर्डले साना लगानीकर्तालाई सचेत गराएको छ ।
बोर्डले अप्रत्याशित रुपमा सेयर बजारमा उछाल आएको भन्दै लगानी गर्नुपूर्व सूचना लिई संयमित भएर लगानी गर्न आग्रह गरेकोछ । सेयर बजारमा गरिने लगानी जोखिम र प्रतिफल दुबै हुने भन्दै बोर्डले बजार र कम्पनीको वास्तविकता बुझेर मात्र लगानी गर्न लगानीकर्तालाई जानकारी गराएको छ । बोर्डले सेयर बजारको मूल्यमा प्रभाव पार्न सक्ने लाभांश र हकप्रद सेयरको घोषणा, व्यवस्थापन परिवर्तन, भावि योजना, कम्पनीको आवधिक र वार्षिक प्रतिवेदनमा उल्लेखितप्रति सेयर आम्दानी, प्रति सेयर लाभाँश, मूल्य र आम्दानी अनुपात प्रतिसेयर नेटवर्थ जस्ता वित्तीय सूचकांकको विश्लेषण गरेर मात्र लगानी गर्न बोर्डले लगानीकर्तालाई भनेको छ ।
कम्पनीको सूचना लिएर बजारमा हल्ला गरेर सेयर बढाउन प्रवृति बढेकाले लगानीकर्तालाई हल्लाका पछि नलाग्न भनेर सचेत गराएको बोर्डका प्रवत्ता नीरज गिरी बताँउछन् । “केही कम्पनीको वित्तीय विवरण सार्वजनी नगरी गोप्य रुपमा चुहिएको पाइयो त्यसैले बोर्डले सचेत गराएको हो” उनले भने ।
बिहीबार नेप्से परिसूचक बढेर १ हजार ८ सय बिन्दु नजिक पुगेको छ । परिचूक वृद्धिसंँगै बजार पुंजिकरण बढेर १९ खर्ब ७९ अर्ब रुपैयाँ पुगेको छ ।
सेयर बजार विश्लेषक रविन्द्र भट्टराई सेयर बजार बढ्दै गएकाले दुई महिनाभित्र नेप्से परिसूचक २ हजार १ सय नाघने बताउछन् । “साउन र भदौ सेयर बजारका लागि उर्वर समय हो” उनले भने “यो समयमा नबढेको सेयर कहिले बढ्छ ?” सेयर बजार बढी रहेकाले सचेत भएर लगानी गर्न उनले लगानीकर्तालाई सुझाएका छन् ।
गएको माघदेखि कागज रहित (डीम्याट ) प्रणालीबाट सेयर कारोबार सुरु भएपछि सहजता बढेको र संविधान जारीपछि राजनीतिक अस्थिरता अन्त्य हुने संभावना बढ्दा सेयर बजारमा उछाल आएको बजार विश्लेषकको भनाइ छ ।
प्रकाशित मिति: शुक्रबार, साउन ७, २०७३ १०:५५
प्रतिक्रिया दिनुहोस्