काठमाडौं । चलचित्र प्राविधिक संघद्वारा आयोजित नवौं अन्तर्राष्ट्रिय नेफ्टा फिल्म अवार्ड कात्तिक २५ (नोभेम्बर १०) मा हुने भएको छ । 

 

यसपटक पनि अवार्ड विदेशमै आयोजना हुने अध्यक्ष पुष्कर लामाले बताए । अवार्ड आयोजना स्थलको घोषणा भने उत्कृष्ट पाँच मनोनयन सार्वजनिकको अवसरमा प्रकाशमा ल्याइने जानकारी उनले दिए ।

 

जुरीहरूले यसै सातादेखि मूल्यांकनका लागि चलचित्र हेर्न सुरु गर्नेछन् । ०७२ वैशाख १ देखि चैत मसान्तभित्र प्रदर्शनमा आएका चलचित्रलाई अवार्डमा सहभागी गराइनेछ ।

 

यसका लागि निर्माताले साउन २१ भित्र आफ्नो चलचित्र नेफ्टाको बागबजारस्थित कार्यालयमा बुझाइसक्नुपर्नेछ । नेफ्टाले यसअघि मलेसिया, हङकङ र कतारमा अवार्ड आयोजना गरिसकेको छ ।

 

नवौं संस्करणमा नेफ्टाले अवार्डको नाममा ‘अन्तर्राष्ट्रिय’ शब्द थपेको छ । “यो अवार्डलाई हामीले नेपाली चलचित्रको अन्तर्राष्ट्रियकरणमा आयाम थप्ने अवसरको रूपमा लिँदैछौं,” अध्यक्ष लामाले भने । 

 

यसपटक सयभन्दा बढी नेपाली कलाकार, प्राविधिक, फिल्म निर्माता, पत्रकारलगायत अवार्डमा सहभागी हुने नेफ्टाले जनाएको छ ।