वासिङटन । अर्बपति वारेन बफेटले परोपकारी कामका लागि २.९ अर्ब डलर दान गर्ने भएका छन् । लगानी गुरुको रुपमा चिनिदै आएका उनले बर्कसायर हाथवेको २.९ अर्ब डलरको सेयरको दान प्रतिबद्धता गरेका हुन् ।

 

यो वर्ष बफेटले १ करोड ९६ लाख क्लासब बी सेयर ५ वटा परोपकारी कामका लागि दान गर्दैछन् । उनले गर्ने दान मध्येको २.२ अर्ब डलर बिल एन्ड मेलिन्दा गेट्स फाउन्डेसनमा जानेछ ।

 

बाँकी रकम बफेटको परिवारसँग सम्बन्ध भएका अन्य परोपकारी संस्थामा जानेछ । दिवंगत पत्नी सुसानको नाममा खडा गरिएको नबरसाकामा रहेको सेरवुड फाउन्डेसन, होवार्ड जी बफेट फाउन्डेसन र नोभो फाउन्डेसन लगायतमा अन्य  रकम जानेछ ।

 

१  दसक भन्दा बढी अवधिदेखि परोपकारी काममा आफ्नो सम्पत्ति दान गर्दै आएका उनले २०१५ मा पनि २.८ अर्ब डलर बराबरको सेयर ५ फाउन्डेसनलाई दिएका थिए ।

 

२०१० मा बफेटले बिल र मेलिन्दा गेट्ससँग मिलेर गिभिङ प्लेज सुरु गरेका थिए । यो प्रयासले उनलाई थप रकम दान गर्नका लागि प्रेरित गरेको थियो । एजेन्सी