काठमाडौं । राप्रपाका अध्यक्ष कमल थापाले दुई पार्टीको एकीकरणपछि नेपालमा नयाँ शक्तिको उदय भएको बताउँदै केही वर्षभित्रमा पहिलो पार्टी बन्ने दावी गरेका छन् ।
राप्रपा र राप्रपा नेपालको एकतासभालाई सम्बोधन गर्दै अध्यक्ष थापाले मुलुकलाई प्रजातान्त्रिक शक्तिको आवश्यकता रहेको र राष्ट्रिय राजनीतिमा पनि वैकल्पिक मार्गचित्रसहितको शक्ति आवश्यक भएकाले आफूहरु एकता प्रक्रियामा अघि बढेको बताए ।
“मुलुकमा प्रजातान्त्रिक शक्तिको आवश्यकता छ,” थापाले भने,“राष्ट्रिय राजनीतिमा वैकल्पिक मार्गचित्रका साथ शक्ति खडा भएको छ । यो नेतृत्व मुलुकले भरोसा गर्न सक्ने नेतृत्व हो । दुरगामी सोँचाई राख्ने साहसिक नेतृत्व हो । नेपालको राजनीतिमा नयाँ शक्तिको उदय भएको छ । यसले नेपाली जनतामा भरोसाको जागरण भएको छ ।”
थापाले आफूहरुलाई धेरै हेपेको बताउँदै एकपटक इख राखेर जुरुक्क उठ्न कार्यकर्तालाई आग्रह गरे । “हामीलाई धेरै हेपेका छन्, इख राखेर एकपटक जुरुक्क उठौं । हामीले कुनै अपराध नगर्दा पनि धेरै हेपे,” थापाले भने, “इख नभएको मान्छे र विष नभएको सर्प काम लाग्दैन । त्यसैले एकपटक जुरुक्कै उठौं ।” तर उनले कसले हेपेको भन्ने बारेमा भने स्पष्ट बताएनन् । थापाले पार्टी छाडेर गएकाहरुलाई पनि पार्टीमा फर्किन आग्रह गरे ।
राष्ट्रियता, प्रजातन्त्र र हिन्दुत्वको धरातल र आधार स्तम्भमा उभिएर एकता गरेको उनले बताए । “यही वैचारिक धरातलमा उभिएर केही वर्षभित्रमा नै राप्रपा नेपाल देशको सबैभन्दा ठूलो पार्टी बन्नेछ र बनाउँनेछौं,” उनले भने । यो पार्टी एकता कसैको रहर होइन । यो एकता विभिन्न स्वार्थबीचको सम्झौता पनि होइन । कसैको आदेशमा एकता भएको पनि होइन ।”
मुलुकको वर्तमान अवस्थाका बारेमा एकपटक समीक्षा गर्न उनले सबैसँग आग्रह गरे ।
“सबैभन्दा पहिला नेपाली भएर एकपटक देशको अवस्थालाई समीक्षा गरौं,” उनले भने,“करिब दश वर्ष अघि भएको १२ बुँदे सम्झौता र परिवर्तनलाई संस्थागत गर्ने क्रममा भएका त्रुटी र कमी कमजारीका कारण देश अहिले चक्रव्युहमा फसेको छ ।”
उनले आज नेपाललाई टुक्र्याएर अखण्ड नेपालबाट अर्को स्वतन्त्र देश बनाउनुपर्छ भन्ने विखण्डनको आवाज उठेकाले यसलाई बेलैमा नसोचे अस्तित्व खतरामा पर्ने बताए ।
थापाले राप्रपा संवैधानिक राजसंस्था वा गणतन्त्र मध्ये कुन बाटोबाट राप्रपा अघि बढ्ने भन्ने बारेमा पार्टीको आगामी महाधिवेशनबाट टुंगो लगाउने बताए । “राप्रपाले गणतन्त्रलाई आत्मसात गरेको छ भने राप्रपा नेपालले राजनीतिबाट माथि उठेको संस्था राजसंस्था चाहिन्छ भनेर राजासहितको प्रजातन्त्रको पक्षमा उभिएको छ,” थापाले भने,“पार्टीमा यो विषय आन्तरिक वहसमा जानेछन् । पार्टीको आन्तरिक महाधिवेशनबाट उपयुक्त समयमा यसको निराकरण गर्नेछौं । देश र जनतालाई केन्द्रविन्दुमा राखेर निर्णय गर्छौं ।”
वर्तमान संविधान समावेशी र समानुपातिक दृष्टिकोणबाट अत्यन्तै प्रगतिशील रहेको छ । राप्रपाका राष्ट्रिय अध्यक्ष पशुपति शमशेर राणाले एकताले उमंग र उत्साह बढेको बताए । देशमा विग्रँदो राजनीतिक अवस्था, भूकम्प प्रभावितको अवस्थाले पनि दुई पार्टीलाई एकतामा लैजान सहयोग पुर्याएको बताए ।
“जनभावना र कार्यकर्ताको भावनालाई समेटेर पार्टी एकता गरेका हौं,” राणाले भने,“राजनीतिमा २ र २ जोडेर ८ पनि हुन सक्छ ।”