काठमाडौं । निर्यातको तुलनामा आयात बढेपछि चालु आर्थिक वर्षको ११ महिनाको अवधिमा व्यापार घाटा सवा ६ खर्ब रुपैयाँ पुगेको छ ।

 

चालु आवको  जेठसम्म भारत, चीन र तेस्रो मुलुकसँगको व्यापार घाटा ६ खर्ब २२ अर्ब ५९ करोड रुपैयाँ पुगेको छ । यो घाटा अघिल्लो आवको सोही अवधिको तुलनामा १.६ प्रतिशत बढी हो । अघिल्लो आवको ११ महिनामा व्यापार घाटा ६ खर्ब १२ अर्ब ८६ करोड रुपैयाँ थियो । चालु आवको जेठसम्म निर्यात व्यापार २० प्रतिशत घटेर ६२ अर्ब १५ करोड रुपैयाँमा सिमित भएको छ । गत वर्षको सोही अवधिमा ७७ अर्ब ८३ करोड रुपैयाँ बराबरको वस्तु तथा सेवा निकासी भएको थियो । कुल आयात ६ खर्ब ८६ अर्ब ७५ करोड रुपैयाँ पुगेको छ । अघिल्लो वर्षको तुलनामा आयात सामान्य घटेको छ । 

 

कुल व्यापारमा आयातको हिस्सा ९१.७ र निकासीको ८.३ प्रतिशत छ । वर्षेनी निकासी आयातबीचको खाडल बढ्दै गएको छ । भारतसँगको व्यापार ६२, चीनसँग १६.४ र तेस्रो मुलुकसँग २१.६ प्रतिशत छ । 

 

चालु आवमा भारतबाट आयात ३.८ प्रतिशतले घटेर ४ खर्ब २० अर्ब ९७ करोड रुपैयाँमा सिमित भएको छ । गत आवको सोही अवधिमा ४ अर्ब ३७ करोड ७२ लाख रुपैयाँ बराबरको वस्तु तथा सेवा आयात भएको थियो । यस्तै चीनबाट आयात १२ प्रतिशतले वृद्धि भई १ खर्ब अर्ब ३ अर्ब ६४ करोड रुपैयाँ पुगेको छ । अघिलो आवको सोही अवधिमा ९० अर्ब १ करोड रुपैयाँ बराबरको वस्तु आयात भएको राष्ट्र बैंकको तथ्यांकमा उल्लेख छ । 

 

तेस्रो मुलुकबाट हुने आयातमा सामान्य गिरावट आएको छ । जेठसम्म १ खर्ब ३४ अर्ब ३४ करोड रुपैयाँ पुगेको छ । गत आवको सोही अवधिमा आयात १ खर्ब ३६ अर्ब २३ करोड रुपैयाँ थियो ।  

 

यस्तै चालु आवको जेठसम्म भारततर्फको निकासीमा ३१.८ प्रतिशत भारी गिरावट आएर ३४ अर्ब ८७ करोड पुगेको छ । गत आवमा ५१ अर्ब १० करोड रुपैयाँ पुगेको छ । चीनतर्फको निकासी पनि ३०.४ प्रतिशतले घटेर १५ अर्ब २ करोडमा सिमित भएको छ । अघिल्लो वर्षको सोही अवधिमा निकासी २१ अर्ब ५८ करोड रुपैयाँ थियो । तेस्रो मुलुकमा हुने निकासी व्यापार ४.९ प्रतिशत बढेर २५ अर्ब ७८ करोड रुपैयाँ पुगेको छ । अघिल्लो आवको सोही अवधिमा २४ अर्ब ५६ करोड रुपैयाँ थियो ।

 

नेपाल उद्योग वाणिज्य महासंघले निकासी व्यापार १ खर्ब रुपैयाँ पुर्याउने लक्ष्य लिएको थियो । १ वर्ष ९१ अर्ब रुपैयाँ पुगेकोमा त्यसपछि क्रमश घट्दै गएको छ । भारतले ६ महिना नाकावन्दी गरेपछि व्यापार ठप्प भएको थियो ।