काठमाडौँ । उत्तर कोरियाले स्पेनिस क्लब बार्सिलोनाका स्टार खेलाडी लियोनल मेस्सीलाई पछि पार्ने खेलाडी उत्पादन गर्ने बताएको छ  । विश्व फुटबलमा आफ्नो अधिपत्य जमाउने उद्देश्यले उत्तर कोरियाले मेस्सी भन्दा राम्रा खेलाडी निकाल्न खेलाडीहरुलाई बिशेष प्रशिक्षण समेत दिन थालेको अन्तर्राष्ट्रिय समाचार संस्थाहरुले जनाएका छन् ।

बेलायती अनलाइन मेट्रो युके डटकमका अनुसार उत्तर कोरियाले आफ्नो देशको फुटबल विकासका लागि राजधानी प्योेङ्याङस्थित अन्तर्राष्ट्रिय फुटबल स्कुलमा विशेष प्रशिक्षण थालेको जनाएको छ । जस्को उद्देश्य आणविक हतियारमा जस्तै फुटबलमा पनि शक्तिशाली बन्नु रहेको मेट्रोले समाचार लेखेको छ ।

“हामीले हाम्रो स्कुलमा खेलाडीहरुलाई विशेष प्रशिक्षण दिइरहेका छौं,”अन्तर्राष्ट्रिय फुटबल स्कुलका प्रशिक्षक रि यु आईले मेट्रोसँग भनेका छन्, “हामीले हाम्रा खेलाडीलाई बिशेष प्रशिक्षण दिनुको कारण लियोनल मेस्सी भन्दा राम्रो खेलाडी बनाउने र विश्व फुटबलमा नयाँ शक्ति बन्ने हो ।”

र,प्रशिक्षक रि यु ले यसमा उत्तर कोरिया सफल हुने समेत दाबी गरेका छन् ।

कट्टर कम्युनिस्ट राष्ट्र उत्तर कोरिया एसियाली फुटवलमा पावरहाउस नै मानिन्छ । उत्तर कोरियाले विश्वकप समेत खेलिसकेको छ । उत्तरकोरियाले सन् २०१० को विश्वकप खेलेको थियो । फिफा बरियतामा उत्तरकोरिया १ सय २६ औं स्थानमा छ ।