पोखरा । गण्डकी प्रदेश सरकारले आर्थिक वर्ष २०७८/०७९ को नीति तथा कार्यक्रम आज ल्याउने भएको छ । सरकारका प्रवक्ता एवम मन्त्री कुमार खड्काका अनुसार सरकारले कोरोना महामारीलाई केन्द्रमा राखेर नीति तथा कार्यक्रम आउने बताए ।
आउँदो आर्थिक वर्षको बजेट तथा नीति कार्यक्रम ल्याउने समयमा नै गण्डकीमा एमाले सरकार ढलेपछि बनेको कांग्रेस सरकारले रातभरि छलफल गरेर नीति तथा कार्यक्रम मस्यौदा गरेको हो । यसमा सरकारमा सहभागी दल कांग्रेस, माओवादी केन्द्र र जनता समाजवादी पार्टीबाट प्रतिनिधीमूलक सांसद र विज्ञहरु बसेर छलफल गरेका थिए ।
नीति तथा कार्यक्रम तयार गर्न योजना आयोगका पूर्वउपाध्यक्ष डा. जगदीशचन्द्र पोखरेल, गण्डकी प्रदेशको योजना आयोगका पूर्वसदस्य भीमा ढुंगाना, मीन श्रेष्ठलगायतले सघाएका छन् । डा. पोखरेल मुख्यमन्त्री कृष्णचन्द्र पोखरेलका भाइ हुन् ।
सरकारले आज ल्याउने नीति तथा कार्यक्रमाथि छलफल पनि आजैदेखि सुरु गर्ने, भोलि पारित गर्ने र भोलि नै बजेट ल्याउने तयारी छ । असार १ गते बजेट ल्याउने कानुनी बाध्यता तथा सरकार गठन प्रक्रियाका कारण सरकारले नीति तथा कार्यक्रम निकै हतारमा ल्याउन बाध्य भएको हो ।
यसअघि नै गण्डकी प्रदेशसभामा बजेटका सिद्धान्त र प्राथमिकतामाथिको छलफल सकिइसकेको छ । गण्डकीमा मन्त्रिपरिषद विस्तार भए पनि कार्यविभाजन नभएका कारण मुख्यमन्त्री कृष्णचन्द्र पोखरेलले नै बजेट ल्याउने भएका हुन् ।