जनकपुरधाम । उपप्रधान एवं परराष्ट्रमन्त्री रघुवीर महासेठले स्थानीय तहलाई अक्सिजन वितरणमा विभेद गरेको पाइएको छ । मन्त्री महासेठले शुक्रवार धनुषाका स्थानीय तहलाई अक्सिजन सिलिण्डर वितरणमा विभेद गरेका हुन् ।
 
धनुषामा १८ ओटा स्थानीय तह छन । सबै स्थानीय तहमा अक्सिजन सिलिण्डर वितरण भएको छ । तर, आँफू निकटका स्थानीय तहमा बढी र अन्य पालिकामा कम दिइएको छ । धनुषाको मिथिला र मिथिला बिहारी नगरपालिकामा प्रधानमन्त्री केपी शार्मा ओली समूहका नगर प्रमुख छन् । उक्त नगरपालिकामा मन्त्री महासेठले १०/१० थान अक्सिजन सिलिण्डर दिए पनि अन्य १६ पालिकामा ५/५ थान मात्र वितरण गरेका छन् । 

अक्सिजनको सबभन्दा बढी आवश्यकता जनकपुरधाम उप–महानगरपालिकालाई भए पनि पार्टी निकट पालिकामा मात्र बढी दिएको भन्दै मन्त्री महासेठको आलोचना भइरहेको छ । बाहिरका संक्रमित व्यक्ति पनि जनकपुरधाम आएर उपचार गराइरहेका छन् । तर, जनकपुरधामलाई पनि मन्त्री महासेठले ५ थान अक्सिजन सिलिण्डर मात्र हस्तान्तरण गरेको भन्दै नगर प्रमुख लालकिसोर साहले असंतुष्टी जनाएका छन् ।

पालिकाले गरे भव्य स्वागत
महासेठको स्वागतमा धनुषाको मिथिला विहारी नगरपालिकाले लाखौं बजेट खर्चेको छ । मन्त्री बनेर पहिलोपटक गृहजिल्ला आएका उनलाई शनिबार मिथिला विहारी नगरपालिकाले भव्य स्वागत गरेको हो ।

मन्त्री महासेठको स्वागतमा ठाउँ–ठाउँमा गेट निर्माण गरिएको छ । मन्त्री महासेठ र उनकी पत्नी पूर्वमन्त्री जुली महासेठ मिथिला विहारी पुग्दा फूलको वर्षा गरियो । मिथिला विहारीका मेयर अनिल यादवले मन्त्री महासेठलाई भगवान झै उनको तस्विरमा आकर्षक फ्रेम लगाई उपहार प्रदान गरे ।

मन्त्री महासेठ दम्पतिलाई स्वागत गर्न नगरपालिकाका सयौं मानिसलाई मेयर यादवले उतारेका थिए । कोरोना रोकथाम तथा नियन्त्रणका लागि प्रशासनले जिल्लाभर निषेधाज्ञा जारी गरेको छ । तर, मन्त्री महासेठ दम्पतिले निषेधाज्ञाको कुनै प्रवाह गरेनन् ।
 
मेयर यादवले मन्त्री महासेठ दम्पतीलाई भव्य स्वागत गरेको स्वीकारे । स्वागतमा कति बजेट खर्च भएको बारे जानकारी दिन मानेन् । “प्रधानमन्त्री र मन्त्रीहरु आएपछि स्वागत त गर्नैपर्छ । गेट र मालामा कति नै खर्च लाग्छ र ?,” उनले भने, “खर्चको हिसाब भएको छैन । विविध खर्च वा अतिथि स्वागत खर्चबाट खर्च भएको होला ।” मन्त्री महासेठले नगरपालिकाभित्र तीनओटा पुलको शीलान्यास र एउटा पुलको उद्घाटन गर्ने कार्यक्रम रहेको उनले बताए ।

मन्त्री महासेठ दम्पति हिजो नै गृहजिल्ला धनुषा आए । धनुषा प्रवेश गरेलगत्तै उनलाई मिथिला नगरपालिकाले स्वागत गरेको थियो । त्यहाँ मन्त्री महासेठ दम्पत्तिलाई पञ्चकन्याले फूलको वर्षा गराएका थिए । मिथिला नगरपालिकाका मेयर हरिनारायण महतोले पनि ठाउँ–ठाउँमा गेट बनाउन लगाएका थिए ।

कोरोना प्रभावितलाई राहत दिन नसकेको र संक्रमितको उपचारमा समेत कुनै चासो नदेखाएका मिथिला र मिथिला विहारी नगरपालिकाले मन्त्रीको स्वागतमा लाखौं रुपैयाँ खर्च गरेका छन् । दुबै ठाउँका मेयर मन्त्री महासेठ निकट व्यक्ति हुन् । त्यसैले कोरोना महामारीले जनता आक्रान्त बनेको बेला पनि मन्त्रीको भव्य स्वागत गरिएको हो ।