काठमाडौं । व्यवसायीहरूले काठमाडौं महानगरपालिकालाई करको दायरा बढाउन सहयोग गर्ने बताएका छन् । आर्थिक वर्ष ०७८/०७९ को वार्षिक बजेट नीति तथा कार्यक्रम तयारीका सन्दर्भमा राजस्व परामर्श समितिका संयोजक एवं महानगरकी उपप्रमुख हरिप्रभा खड्गी श्रेष्ठको अध्यक्षतामा बसेको बैठकका सहभागी व्यवसायीहरूले संघ महासंघमार्फत सहयोग गर्ने बताएका हुन् ।
“महानगरको समृद्धिमा व्यवसायीहरूको साथलाई सँगै लिएर जाने हाम्रो सोच हो । अहिलेको विषम परिस्थितिमा राजस्वका दरमाभन्दा दायरामा हाम्रो दृष्टि छ,” बैठककी संयोजक खड्गी श्रेष्ठले भनिन, ‘‘तपाईँहरूको सहयोगबाट हामीले राजस्व संकलनको लक्ष्य प्राप्त गर्न सक्छौँ । राजस्व उठाउन सरकारले व्यवसायी खोज्दै जाने, व्यवसायी छल्दै जाने होइन । व्यवसायीका समस्या सरकारले समाधान गर्ने र व्यवसायीले कर तिर्ने हो । यसमा आफ्नो आफ्नो भूमिका निर्वाह गरौँ ।”
बैठकमा मुख्यगरी महानगर क्षेत्रभित्रका वस्तुगत र सेवागत व्यवसायको सञ्चालन, सञ्चालकको मनोविज्ञान, व्यवसाय दर्ता र नविकरण प्रक्रिया जस्ता बुँदामा छलफल गरी दायरा बढाउने विषयमा छलफल भएको थियो । काठमाडौँमा उत्पादन हुने वस्तुसँग सम्बन्धित र उत्पादन नहुने व्यापारसँग सम्बन्धित विषयलाई अलग राखेर हेरिनुपर्ने व्यवसायीहरूको धारणा छ । अटो वर्कसपजस्ता व्यवसायलाई सहरबाहिर धपाउने गरेको, व्यवसायिक क्षेत्र नतोक्दा बहालमा व्यवसायीमाथि धेरै भार रहेको व्यवसायीको भनाइ छ ।
राजस्व विभागका प्रमुख डा. शिवराज अधिकारीकाअनुसार महानगरभित्रका व्यवसायलाई करीब ३ सय प्रकारमा वर्गीकरण गरेर व्यवसाय कर लगाउन प्रस्ताव तयार गरिएको छ । व्यवसाय गर्ने व्यवसायीका करिब ४० वटा संघ महासंघहरूसँग नियमित छलफल गरेर प्रस्ताव तयार पारिएको हो । उनीहरूले यसअघि भोगेका समस्या र असमानतालाई व्यवस्थापन गर्नेगरी आगामी वर्षका नीति कार्यक्रम र योजना तयार पार्ने क्रममा रहेको उनले बताए ।