काठमाडौं । नेपाली राष्ट्रिय फुटबल टोलीले शुक्रबार (भोलि) अष्ट्रेलियासित प्रतिस्पर्धा गर्दै छ ।

नेपालले सन् २०२२ को विश्वकप छनोट र २०२३ को एसिया कप छनोटअन्तर्गत समूह चरणको आफ्नो अन्तिम खेल खेल्न लागेको हो । नेपाल र अष्ट्रेलियाबीचको खेल नेपाली समयानुसार राति ९ः१५ मा हुनेछ ।

नेपालले अष्ट्रेलियासँग खेल्नुअघि अष्ट्रेलियाका प्रशिक्षक जर्हाम अर्नाेल्डले नेपाली टोली एकदमै मेहनती रहेको बताए । उनले आफूहरु नेपालसँग खेल्नका लागि उत्साहित भएको पनि बताए ।

“नेपाली टोलीको खेल्ने तरिका धेरै राम्रो छ । नेपाली टोलीका प्रशिक्षकले पनि टिमलाई राम्रो बनाइरहेका छन् । हामी नेपालको खेललाई सम्मान गर्दछौँ । र, खेलका लागि उत्साहित छौँ,” अर्नेल्डले भने ।

नेपाली टोली पहिलेजस्तो नभएको पनि उनले बताए । नेपाललाई आफूहरुले कमजोर नआँकेको उनको भनाइ छ । नेपाल अष्ट्रेलियासँगको पहिलो लेगमा ५–० ले पराजित भएको थियो ।

नेपालले यसअघिका दुई खेलमा चाइनिज ताइपेइलाई २–० हराएको छ । त्यसबाहेक नेपाल पराजित भएको छ । नेपालको विश्वकप छनोटका लागि अघिल्लो चरण प्रवेशको सम्भावना सकिसकेको छ ।