काठमाडौं । वाग्मती प्रदेश सरकारले आगामी आर्थिक वर्षदेखि सार्वजनिक सेवा विद्युतीय माध्यमबाट गर्ने नीति लिने भएको छ । बिहीबार वाग्मती प्रदेशको नीति तथा कार्यक्रम प्रस्तुत गर्दै प्रदेश प्रमुख विष्णुप्रसाद प्रसाईंले यस्तो घोषणा गरेका हुन् ।
“वाग्मती प्रदेश डिजिटल प्रदेश भन्ने सोचसहित प्रदेश यातायात, सवारीचालक अनुमतिपत्र, उद्योग वाणिज्य, व्यवसाय दर्तालगायत सेवालाई विद्युतीय माध्यमबाट प्रवाह गर्ने नीति लिइनेछ,” उनले भने ।
यस्तै, प्रदेशमा रहेका आयोजनाहरुको नतिजामा आधारित अनुगमन गर्ने नीति लिइने बताइएको छ ।
कोभिड–१९ बाट प्रभावित पर्यटन क्षेत्रलाई पुनरुत्थान गर्न प्रदेशका कर्मचारीहरुलाई प्रदेशभित्रका ठाउँमा घुम्न जान विशेष कार्यक्रम ल्याउने पनि भनिएको छ ।