काठमाडौं । नेपाल धितोपत्र बोर्डले निजी क्षेत्रको लगानीमा नयाँ स्टक एक्सचेन्ज सञ्चालनमा ल्याउने विषयमा अध्ययन गरेको छ ।
धितोपत्र बोर्डको २९औँ वार्षिकोत्सव कार्यक्रममा बोल्दै बोर्ड अध्यक्ष भिष्मराज ढुंगानाले नयाँ स्टक एक्सचेन्जको विषयमा अध्ययन भइसकेको भए पनि छलफल भने बाँकी रहेको बताए । उनले स्टक एक्सचेन्जलाई प्रतिस्पर्धी बनाउन आवश्यक पहल गर्ने बताए ।
यस्तै, बोर्डले नयाँ धितोपत्र दलाल व्यवसायीलाई संस्थागत रुपमा बजार प्रवेश गराउने तयारी भएको बताए । उनले नेप्सेमा आवेदन दिएर अलपत्र परेका बैंकका सहायक कम्पनीले लाइसेन्स दिने/नदिने विषयमा केही नबताए पनि नयाँ ब्रोकर लाइसेन्स दिने बताए ।
बजार विस्तारको लागि धितोपत्र दलाल व्यवसायीको शाखा विस्तार भइरहेको उनले बताए । यस्तै, नेप्सेको सूचक गणना विधिलाई पनि सुधार गर्ने बताए ।
सरकारी ऋणपत्रको कारोबारको पनि व्यवस्था मिलाउने उनले बताए । यस्तै, सीडीएसीको पुनःसंरचना गर्दै क्षमता वृद्धि गर्ने बताए ।
