वासिङटन । अमेरिकाका पूर्वउपराष्ट्रपति माइक पेन्सले बिहीबार एक कार्यक्रममा बोल्दै डोनाल्ड ट्रम्प र आफूबीच गत जनवरी ६ मा भएको संसद हमलाबारे एकदमै फरक धारणा रहेको स्वीकार गरेका छन् ।
उनका अनुसार ह्वाइटहाउस छाडिसकेपछि पनि ट्रम्प र उनले धेरैपटक फोनमा कुरा गरे र उनलाई अझैपनि आफ्ना उपलब्धीहरुप्रति गर्व छ । तर यससँगै उनले अर्को आश्चर्यजनक खुलासा गर्दै भनेका हुन्, “हामी सायदै कहिल्यै त्यो घटना सम्बन्धी आँखामा आँखा जुधाएर एकअर्कालाई हेर्न सक्छौँ होला ।”
६ जनवरीमा भएको अमेरिकी संसद हमलाको घटनामा विद्रोहीहरुले ‘पेन्सलाई झुन्ड्याउनुपर्छ’ भन्ने नारा पनि लगाएका थिए ।
उनले राष्ट्रपति निर्वाचनमा जो बाइडेनको जितलाई उल्ट्याउन नसकेपछि ट्रम्प समर्थकहरु पेन्सका विरुद्धमा उत्रिएका थिए ।
त्यस समय ट्रम्प चाहिँ ह्वाइटहाउसमा बसेर चुपचाप तमाशा हेरिरहेका थिए र यो घटना पश्चात् ट्रम्प र पेन्सबीच केही दिनसम्म बोलचाल बन्द भएको पनि खबर गरिएको थियो । बाइडेनको शपथ ग्रहण कार्यक्रममा पेन्सले उपस्थिति जनाउँदा ट्रम्प चाहिँ फ्लोरिडा गइसकेका थिए जसले दुवै आ–आफ्नो बाटो लागेको प्रष्ट पारेको थियो ।
यसरी पेन्सको यो भनाइलाई आश्चर्यजनक मानिएको छ किनकी ४ वर्षसम्म उनले विभिन्न काण्ड, महाअभियोगका मुद्दा, गम्भीर विवाद र अपराधिक अनुसन्धानका वावजुद ट्रम्पका साथमा उभिएर इमान्दारीपूर्वक सधैँ उनको समर्थन गरिरहेका थिए । तर संसद हमलाबारे आफूहरुबीच मतभेद भएपनि पेन्सले आफ्नो भाषणमा ट्रम्पको प्रशंसा नै गरेका हुन् ।
यता ट्रम्पले चाहिँ चुनावमा बाइडेनको जित सुनिश्चित गराएकामा अझैसम्म पनि पेन्सको आलोचना गर्ने गरेको पाइन्छ । २०२४ को अमेरिकी राष्ट्रपति चुनावमा पेन्सले पनि उमेदवारी दिने प्रबल सम्भावना रहेको छ । गार्जियन