बीबीसी । ७० वटा दुर्लभ बाघ मार्ने शिकारीलाई बांग्लादेशमा २० वर्षको खोजी पश्चात् पक्राउ गरिएको छ । 

हबिब तलुक्दरलाई ‘टाइगर हबिब’ भनेर चिनिने गरिन्थ्यो जो अन्ततः खुफीया जानकारी मार्फत पत्ता लागि पक्राउ परेको प्रहरीले जनाएको छ । उनले भारत र बांग्लादेशबीचको सिमानास्थित सुन्दरवन क्षेत्रमा शिकार गर्ने गर्दथे जहाँ ‘बेंगाल टाइगर’ प्रजातिका बाघको विश्वकै ठूलो जनसङ्ख्या बसोबास गर्दछ । अहिले भने यस प्रजातिका केही हजार बाघ मात्र जङ्गलमा पाइन्छ । 

कालोबजारी गर्नेहरुले यसका छाला, हड्डी र मासु समेत विश्वव्यापी रुपमा विक्री गर्ने गरेका छन् । प्रहरी प्रमुख साइदुर रेहमानले ढाका ट्रिब्युन मिडियासँग बोल्दै भने, “उनी लामो समयदेखि लुक्दै भाग्दै गरिरहेका थिए ।”

५० वर्षीय हबिबले आफ्नो करिअरको सुरुवातमा जङ्गलमा मौरीबाट मह संकलन गर्ने  गर्दथे । मह शिकारी अब्दुज सलामले एएफपी न्युज एजेन्सीसँग बताए अनुसार स्थानीय वासीहरुले हबिबलाई सम्मान गरे बराबर उनीसँग डराउने पनि गर्दथे । 

उनले थप भने, “उनी गोप्य रुपमा सुन्दरवन प्रवेश गरि जंगली जीवजन्तुहरुको शिकार गर्दथे । वन भित्र पस्न लामो समय अगाडि नै प्रतिबन्ध लगाइएको भएपनि उनी त्यहाँ जान्थे । उनी विरुद्ध थुप्रै मुद्दा दायर भइसकेको छ तर उनले यस्ता अपराधिक गतिविधि छाडेनन् । र केही शक्तिशाली ‘ग्याङ’ हरु पनि यसमा संलग्न रहेका छन् । ”