कोलकाता । हालै भारतको पश्चिम बंगालबाट निर्वाचनमा पराजित मुख्यमन्त्री ममता बनर्जीले पश्चिम बंगालको भवानीपुर निर्वाचन क्षेत्रबाट उपनिर्वाचनमा प्रतिस्पर्धा गर्ने भएकी छन् ।
पश्चिम बंगालमा बहुमत ल्याउन सफल त्रिणमूल कांग्रेस (टीएमसी)ले मुख्यमन्त्रीमा बनर्जीलाई नै सिफारिस गरी उनले मुख्यमन्त्रीको रूपमा शपथ लिइसकेकी छन् । तर, उनी मुख्यमन्त्री रहिरहनका लागि आगामी ६ महिनाभित्र पश्चिम बंगालको कुनै एक क्षेत्रमा निर्वाचित हुनुपर्नेछ ।
मुख्यमन्त्रीले उपनिर्वाचनमा अहिले प्रतिस्पर्धा गर्ने भनिएको निर्वाचन क्षेत्र उनले यसपहिले दुईपटकसम्म निर्वाचन जितेको क्षेत्र हो ।
यस वर्षको निर्वाचनमा उनले नन्दीग्राम क्षेत्र रोजे पनि भारतीय जनता पार्टीका तर्फबाट उमेदवार बनेका सुबेन्दु अधिकारीसँगको रोचक प्रतिस्पर्धामा एक हजार ९५६ मत अन्तरले पराजित भएकी थिइन् ।
पश्चिम बंगालमा निर्वाचन आफ्नो दलको पक्षमा आएपछि उनलाई त्रिणमूल कांग्रेसले मुख्यमन्त्री बनाएको हो ।
त्रिणमूलका वरिष्ठ नेता तथा भवानीपुर क्षेत्रबाट निर्वाचित सांसद सोभान्देव चटर्जीले पार्टीको सिफारिसमा शुक्रबार नै पदबाट राजीनामा दिएका थिए । “पार्टीका सबै नेताहरूले छलफल गरी उनलाई यहाँबाट प्रतिस्पर्धा गराउने सुझाव आएपछि मैले सोचेँ कि मुख्यमन्त्रीका लागि मेरो सिट खाली गर्नुपर्नेछ । त्यहाँ कुनै दबाब छैन । सरकार चलाउनका लागि उहाँ योग्य व्यक्ति हो । मैले उहाँसँग कुरा गरेँ । यो उहाँको नै सिट थियो । मैले यसलाई सुरक्षित मात्रै गरेको हो,” चटर्जीले राजीनामापछि सञ्चारमाध्यमसँग बताए । रासस/एएनआई
