ब्रसेल्स । युरोपेली संघ (ईयू)को औषधि नियामक निकायले फाइजरको कोरोनाविरुद्धको खोप अब यसअघि भनिएभन्दा निकै बढी समय फ्रिजमा भन्डारण गर्न सकिने जनाएको छ ।

युरोपेली औषधि निकाय ईएमएले जमेको खोप पूर्णतया पग्लिएको अवस्थामा नखोलिएको खोपको भाँडो (भायल) एक महिनासम्म फ्रिजमा राख्न सकिने जनाएको हो । यसअघि, त्यसरी भन्डारण गर्नका लागि पाँच दिनको समय निर्धारण गरिएको थियो ।

यो खोप बढी समय भन्डारण गर्न पाउँदा ईयू सदस्य देशहरूको खोप कार्यक्रममा उल्लेख्य प्रभाव पर्ने अपेक्षा गरिएको छ । यसअघिको तोकिएको भन्डारण मापदण्डले गर्दा फाइजर खोपलाई संसारका केही ठाउँमा प्रयोग गर्न निकै कठिन बनाएको थियो ।

फेब्रुअरीमा अमेरिकाले यस खोपको भन्डारण र पारवहनको मापदण्डलाई सुधारेर माइनस १५ देखि माइनस २५ डिग्री सेल्सियसमा फ्रिजमा दुई सातासम्म राख्न सकिने व्यवस्था भएको जनाएको थियो । सुरुमा त्यसलाई माइनस ८० देखि माइनस ६० डिग्री सेल्सियसमा भन्डारण गर्नुपर्ने आवश्यक ठानिएको थियो ।

यसै महिनाको सुरुमा क्यानडाले फाइजर खोप १२ देखि १५ वर्षबीचका बालबालिका समेतलाई प्रयोग गर्न स्वीकृति दिएको छ । रासस/एएफपी