जेरुसलेम । इजरायली सेनाले प्यालेस्टाइनको गाजा पट्टीमा विद्रोही समूह हमास लक्षित आक्रमणहरु बढाएको छ । सेनाले शुक्रबार गाजा क्षेत्रमा हवाई र स्थल आक्रमण बढाएको इजरायली सेनालाई उदृत गर्दै बीबीसीले जनाएको छ ।
संयुक्त राष्ट्रसंघ, युरोपेली संघ, अमेरिका, रुसलगायतले शान्ति कायम राख्न अपिल गरेका छन् । यसका बाबजुद दुबै पक्षले आक्रमण नरोकेको अन्तर्राष्ट्रिय सन्चामाध्यमले जनाएका छन् । बीबीसीका अनुसार आक्रमणमा परी गाजा क्षेत्रमा १०० र इजरायलमा ७ जनाले ज्यान गुमाएका छन् भने अलजजिराका अनुसार ३१ बालबालिकासहित ११३ प्यालेस्टिनी, ६ इजरायली र एक भारतीय नागरिकले ज्यान गुमाएका छन् । तर, इजरायली अधिकारीहरुले भने मारिनेहरु विद्रोही रहेका दाबी गरेको छ ।
यसैबीच, इजरायलका विभिन्न क्षेत्रमा यहुदी र इजरायली अरबहरुबीच झडपका घटनाहरु पनि बढेका छन् । झडपमा संलग्न कम्तिमा ४०० जनालाई इजरायली प्रहरीले पक्राउ गरेको छ । गत सोमबारदेखि इजरायल र हमासबीच भड्केको हिंसाले उग्र रुप लिँदा इजरायलले गाजापट्टीमा र हमासले इजरायलका विभिन्न स्थानमा आक्रमण गर्ने क्रम रोकिएको छैन । लडाइँ रोक्न अन्तर्राष्ट्रिय समुदायले गरेको कूटनीतिक प्रयासले कुनै प्रभाव पारेको छैन ।
उत्तरी इजरायलको समुन्द्रि तटमा लेबनानबाट समेत तीन रकेट आक्रमण भएको इजरायली रक्षा बलले जनाएको छ । आक्रमणको जिम्मेवारी कुनै संगठनले लिएके छैन । लेबनानमा हेजबोल्लाह लगायत अन्य दर्जनौं आतंकवादी संगठन सक्रिय छन् । आक्रमण बढेपछि इजरायलमा अन्तर्राष्ट्रिय उडान बन्द गरिएको छ ।
जेरुसलेमको विवादित अल–अक्सा मस्जिदमा सैन्य कारबाही कम गर्न इजरायललाई अन्तर्राष्ट्रिय समुदायले दबाब दिए हमास युद्धविरामका लागि तयार रहेको सो समूहका एक वरिष्ठ अधिकारीलाई उदृत गर्दै बीबीसीले जनाएको छ ।
