काठमाडौं । देशभर पछिल्लो २४ घण्टामा ८ हजार ९६० जना कोभिड संक्रमित थपिएका छन् । २० हजार २४५ वटा नमूनाको पीसीआर परीक्षण गरिएकोमा झन्डै ९ हजारमा संक्रमण पुष्टि भएको हो ।
योसँगै नेपालमा कोभिड संक्रमित हुनेको संख्या ४ लाख ३१ हजार ९९१ पुगेको छ भने अहिले सक्रिय संक्रमितको संख्या १ लाख ५ हजार २०७ रहेको स्वास्थ्य तथा जनसंख्या मन्त्रालयले जनाएको छ ।
त्यस्तै पछिल्लो २४ घण्टामा २१४ जनाको मृत्यु भएसँगै नेपालमा कोभिड संक्रमणका कारण मृत्यु हुनेको संख्या ४ हजार ४६६ पुगेको छ । विगत २४ घण्टामा ५ हजार ५५ जना संक्रमणमुक्त भएका छन् भने ४९७ जना क्वारेन्टिनमा रहेका छन् ।
पछिल्लो समय संक्रमित हुनेहरुमा काठमाडौं उपत्यकामा सबैभन्दा धेरै छन् । उपत्यकाका तीन जिल्लामा मात्रै आज ३ हजार ५६२ जना संक्रमित थपिएका छन् ।
त्यस्तै उपत्यकाबाहिर रुपन्देहीमा सबैभन्दा बढी ५११ जना नयाँ संक्रमित थपिएका छन् । कैलालीमा ३७०, मोरमा ३५८, झापामा २५८, चितवनमा २९३, कास्कीमा २३७, दाङमा २१७, बाँकेमा २५२, कञ्चनपुरमा, धनुषामा २०४ जना संक्रमित थपिएका हुन् ।
अन्य जिल्लामा भने नयाँ संक्रमितको संख्या २ सयभन्दा कम छ । पछिल्लो २४ घण्टामा संक्रमित हुनेहरुमा सबैभन्दा धेरै ३० देखि ३९ बर्षका नागरिक २ हजार ६१ जना छन् । त्यस्तै २० देखि २९ बर्षका १ हजार ९४९ जना, ४० देखि ४९ बर्षका १ हजार ६०० जना , ५० देखि ५९ वर्षका १ हजार २०७ जना, ६० देखि ६९ वर्षका ७०३ जना, ७० देखि ८९ वर्षका ३१९ जना, ८० देखि ८९ उमेर समूहका ९७ जना, ९० देखि १०० वर्षसम्मका १९ जना र उमेर नखुलेका ५४ जना रहेका छन् ।
त्यस्तै पछिल्लो २४घण्टामा ९ वर्ष मुनिका बालबालिका २०८ जना र १० देखि १९ वर्षका ६२५ जना संक्रमित भएको स्वास्थ्य तथा जनसंख्या मन्त्रालयको तथ्याक छ ।
देशभर आईसीयू कक्षमा उपचारमा रहेका १ हजार ३८१ मध्ये २०५ जना काठमाडौं उपत्यकामा रहेका छन् । त्यस्तै ३८० जना भेन्टीलेटरमा उपचार गराई रहेकामा ९२ जना उपत्यकाका तीन जिल्लामा रहेका छन् ।
