कोलकता । भारतको पश्चिम बंगालमा भएको विधानसभा चुनावमा मुख्यमन्त्री ममता बनर्जी पराजित भएकी छिन् । नन्दीग्रामबाट चुनाव लडेकी तृणमुल कांग्रेस (टीएमसी)की नेतृ ममता बनर्जी भारतीय जनता पार्टी (भाजपा)का उम्मेद्वार सुवेन्दु अधिकारीसँग १ हजार ९५६ भोटको अन्तरले पराजित भएकी हुन् ।

टीएमसीका नेता अधिकारी चुनाव आउनै लाग्दा भाजपा प्रवेश गरेका थिए । पछिल्लो दुई वर्षमा टीएमसीका १६ विधायकसहित ३० नेता भाजपा प्रवेश गरेका छन् । यीमध्ये १२ विधायकसहित १९ नेताले यस निर्वाचनमा पराजय व्यहोरेका छन् ।

बनर्जी पराजित भएपनि टीएमसीले भने शानदार जित हासिल गरेको छ । २९२ सिटका लागि भएको निर्वाचनमा समाचार तयार पार्दासम्म टीएमसीले २१० स्थानमा जित निकालेको छ भने भाजपा ७७ स्थानमा विजयी भएको छ । बाँकी स्थानमा पनि टीएमसी नै अघि रहेको यहाँको निर्वाचन आयोगलाई उदृत गर्दै भारतीय सन्चारमाध्यमले जनाएका छन् ।

भाजपालाई जित दिलाउन प्रधानमन्त्री मोदीसहितका नेताहरुले ठूलो कसरत गरे पनि टीएमसीले शानदार जित निकाल्ने देखिएको हो । कोरोना महामारीको समयमा स्वास्थ्य मापदण्डविपरित चुनावी र्याली निकाले पनि भाजपाले अपेक्षाकृत जित निकाल्न नसकेको हो ।