वासिङ्टन । अमेरिकी राष्ट्रपति जो बाइडेनले पहिलो पटक संसदलाई सम्बोधन गरेका छन् । कार्यभार सम्हालेको १०० औँ दिनको पूर्वसन्ध्यामा राष्ट्रपति बाइडेनले संसदलाई सम्बोधन गरेका हुन् ।
आफ्नो पहिलो सम्बोधनमार्फत् उनले रोजगारी, शिक्षा र सामाजिक सुरक्षाको क्षेत्रलाई विशेष प्राथमिकतामा राखेर योजनाहरू सार्वजनिक गरेका छन् । उनले चार ट्रिलियन डलर बराबरको योजना सार्वजनिक गरेका बीबीसीले जनाएको छ । बाइडेनले यो योजनालाई एक पुस्तामा एक पटकको लगानी बताएका छन् ।
७८ वर्षीय राष्ट्रपति बाइडेनले अमेरिकी रोजगार योजना र अमेरिकी परिवार योजनालाई विशेष महत्व दिएका छन् । उनले अमेरिकी रोजगार योजनालाई 'अमेरिका निर्माणको मूल खाका'का रुपमा चित्रण गरेका छन् ।
"कर्पोरेट अमेरिका र एक प्रतिशत धनीले आफ्नो उचित हिस्सा तिर्ने समय आएको छ", सम्बोधनका क्रममा उनले भने । यी सबै कामहरू जलवायु परिवर्तनलाई ध्यानमा राखेर सञ्चालन गरिने पनि बाइडेनले बताएका छन् ।
बाइडेनको योजनामा यातायात विकासमा ६२१ विलियन डलर, वृद्ध तथा अशक्तको हेरचाहमा ४०० बिलियन, बालबालिकाको हेरचाहमा २२५ बिलियन, शिक्षामा २०० बिलियन र खानेपानीको पूर्वाधार निर्माणमा १११ बिलियन डलर छुट्याइएको छ ।
यद्यपि यी योजनाहरू कार्यान्वयनमा जानुअघि संसद्मा व्यापक बहस हुने जनाइएको छ । बाइडेनको पार्टी डेमोक्रयाटमै पनि उनको महत्वकांक्षी योजनालाई लिएर केही हदसम्म फरक मतहरू देखिने आकलन गरिएको छ ।