नयाँदिल्ली । मद्रास उच्च अदालतले भारतमा कोरोनाको दोस्रो लहरमा यहाँको निर्वाचन आयोगलाई मुख्य जिम्मेवार ठहर गरेको छ । राजनीतिक दललाई कोभिड–१९ प्रोटोकल दुरुपयोग गर्नबाट नरोकेको भन्दै अदालतले आयोगलाई दोषी ठहर गरेको भारतीय सञ्चारमाध्यमले जनाएका छन् ।

“यो अवस्थाका लागि जिम्मेवार निकाय तपाईंहरू (आयोग) नै हुनुहुन्छ । अदालतको पटक पटकको आदेशको बेवास्ता गर्दै तपाईंहरूले राजनीतिक दलको र्याली रोक्न कुनै कदम चाल्नु भएन,” प्रधानन्यायाधिश सन्जिव बेनर्जी र न्यायाधीश सेन्थिलकुमार राममुर्तिले भने ।

आयोगसँग असन्तुष्ट बनेका प्रधानन्यायाधिश बेनर्जीले ‘चुनावी र्‍याली भइरहँदा तपाईंहरू कुन ग्रहमा हुनुहुन्थ्यो’ भन्दै आयोगका पदाधिकारीहरूलाई प्रश्न गरेका छन् । उनले आयोगलाई सबैभन्दा गैरजिम्मेवार संस्था बताउँदै आयोगका पदाधिकारीहरूलाई हत्या अभियोग लगाउनुपर्ने बताए ।

आगामी मे २ अघि कोभिड–१९ प्रोटोकलको उचित पालना गरेको नपाइए मत गणना रोकिदिने अदालतले चेतावनी दिएको छ ।

भारतको बंगाल, तमिल नाडु, केरला, आसाम र पन्डिचेरीमा जारी निर्वाचनका कारण यी क्षेत्रहरूमा कोरोना भाइरस संक्रमण निकै बढेको छ । टाइम्स अफ इन्डियाबाट