सिओल । यौन शोषणमा परेका दक्षिण कोरियाका पीडितहरूले जापानसँग गरेको क्षतिपूर्ति माग यहाँको एक अदालतले खारेज गरिदिएकाे छ । युद्धकालमा यौन शोषण गरेको भन्दै पीडितहरूले क्षतिपूर्तिका लागि गरेको मागलाई अदालतले अस्वीकार गरिदिएको हो ।
अदालतले जापान सरकारलाई अन्तर्राष्ट्रिय कानुनको सिद्धान्तअनुसार नागरिक क्षेत्राधिकारबाट माफी दिनुपर्ने फैसला सुनाएको दक्षिण कोरियाली समाचार एजेन्सीलाई उदृत गर्दै अलजजिराले जनाएको छ ।
सन् २०१३ मा युद्धकालमा यौन शोषणमा परेका १२ जना महिलाले जापान सरकारविरुद्ध मुद्दा दायर गरेका थिए । गत जनवरीमा प्रत्येक पीडितलाई ८९ हजार अमेरिकी डलर क्षतिपूर्ति दिन आदेश दिएको अदालतले नै अहिले फरक निर्णय सुनाएको हो ।
युद्धकालको सबै क्षतिपूर्ति सन् १९६५ को सन्धीअनुसार तिरिएको भन्दै जापानले सो निर्णयप्रति आपत्ति जनाएको थियो ।
दुवै देशले सन् २०१५ मा एक सम्झौतामार्फत विवाद समाप्त गर्न सहमति जनाएका थिए । तर सन् २०१७ मा दक्षिण कोरियाका प्रधानमन्त्री मुन जाई–इनले सो सम्झौतालाई अमान्य घोषणा गरेपछि जापानले औपचारिक रूपमा माफी माग्दै यौन शोषणमा परेका पीडितको सहयोगमा ९६ लाख डलर सहयोग गरेको थियो ।
सन् १९१० देखि १९४५ सम्म जापानले कोरियाली प्रायद्वीप औपनिवेशिक शासन गरेको थियो । सो समयमा हालका दुवै कोरियाली देशका गरी दुई लाख बढी महिला र युवतीको यौन शोषण भएको अनुमान गरिएको छ ।
अधिकारकर्मीहरूले अदालतको बुधबारको फैसलाको आलोचना गरेका छन् । एम्नेस्टी इन्टरनेसनलले फैसलाले पीडित र उनीहरूका परिवारलाई न्याय नगरेको भन्दै फैसला निराशाजनक रहेको प्रतिक्रिया दिएको छ ।