नेपित । म्यानमारमा रहेको एक पर्यवेक्षक समूहले सैन्य ‘कू’को विरोध गर्ने प्रदर्शनकारीको हत्या र यातनाका विषयमा चिन्ता व्यक्त गर्दै कारबाहीका लागि अन्तर्राष्ट्रिय समुदायसँग अपिल गरेको छ । आइतबार साँझ सेनाको स्वामित्वमा रहेको टेलिभिजन एमआरटीभिले पक्राउ परेका ६ प्रदर्शनकारीको विभत्स फोटो सार्वजनितक गरेको थियो ।
शनिबार दिउँसो २ बजे यांकिनको सरकारी कार्यालयमा बम प्रहार गरेको आरोपमा सेनाले २ महिला र ४ पुरुषलाई पक्राउ गरेको थियो । आइतबार तस्बिर सार्वजनिक गर्दै सेनाले उनीहरुविरुद्ध बम विस्फोट गराएको आरोप लगाएको अलजजिराले जनाएको छ ।
सार्वजनिक तस्बिरमा उनीहरुको अनुहारभरी रगत लतपतिएको देखिन्छ भने एक महिलाको च्यापुमा गम्भिर चोटसमेत लागेको देखिन्छ ।
“यो सैन्य जुन्ताले यातनालाई आफ्नो नीति बनाएको छ,” असिस्टेन्ट एसोसिएसन फर पोलिटिकल प्रिजनर्स (एएपीपी)ले ट्विटमा लेखेको छ, “अन्तर्राष्ट्रिय समुदायले यसविरुद्ध तत्काल कदम नचाल्ने हो भने हत्या र यातना जारी रहने निश्चित छ ।”
एएपीपीका अनुसार गत फेब्रुअरी १ मा सेनाले सत्ता हातमा लिए यता हालसम्म ७३७ जनाले ज्यान गुमाइसकेका छन् भने ३ हजार २२९ जना सेनाको नियन्त्रणमा छन् ।