वासिङ्टन । जोनसन एन्ड जोनसन कोरोनाविरुद्धको खोपले रगत जम्ने समस्या देखिएपछि अमेरिका, दक्षिण अफ्रिका र युरोपेली संघले खोप लगाउन रोक्ने भएका छन् । खोप लगाएका ६८ लाखमध्ये ६ जनामा रगत जम्ने समस्या देखिएपछि यी देशले अस्थायी रुपमा खोप लगाउन रोक्ने भएका हुन् ।
समस्या देखिएकामध्ये एकजनाको मृत्यु भएको र अर्का एकजनाको अवस्था गम्भीर रहेको अमेरिकी खाद्य तथा औषधि प्रशासन (एफडीए)ले जनाएको छ ।
समस्या देखिएका सबै १८ देखि ४८ वर्षका महिला रहेका छन् । खोप लगाएको १३ दिनपछि उनीहरुमा रगत जम्ने समस्या देखिन थालेको थियो । यसअघि, एष्ट्राजेनिका खोप लगाएपछि पनि निकै थोरै मानिसमा यस्तै समस्या देखिएको थियो ।
अमेरिकामा हालसम्म तीन करोड १० लाख बढी मानिस कोरोनाभाइरस संक्रमित भइसकेका छन् भने पाँच लाख ६२ हजारको मृत्यु भइसकेको छ ।
दक्षिण अफ्रिकामा रगत जम्ने समस्या नदेखिए पनि यहाँ पनि यो खोप लगाउन रोकिँदै छ । कोरोनाको दक्षिण अफ्रिकी भेरियन्टमा अन्य खोपभन्दा जोनसन एन्ड जोनसन खोप बढी प्रभावकारी देखिएपछि दक्षिण अफ्रिकामा यसले मान्यता पाएको थियो ।