नयाँ दिल्ली । रुसले विकास गरेको कोरोना भाइरसविरुद्धको खोपलाई भारतले आपतकालीन प्रयोगको अनुमति दिएको छ । भारतमा कोभिड–१९ को दोस्रो लहर देखिएसँगै सोमबार रुसले विकास गरेको ‘स्पुतनिक भी’ खोपलाई आपतकालीन प्रयोगको अनुमति दिइएको टाइम्स अफ इन्डियाले जनाएको छ ।
भारतमा आइतबार मात्र एक लाख ६८ हजार ९१२ जनामा कोरोना संक्रमण देखिएसँगै भारत धेरै संक्रमित हुने दोस्रो देश बनेको छ ।
रुसले विकास गरेको यो खोपको प्रभावकारिता ९१.६ प्रतिशत रहेको पाइएको छ । रुसले गत वर्षको अगस्टमा नै यो खोपलाई दर्ता गरेर सार्वजनिक प्रयोगको अनुमति दिइसकेको छ ।
भारतले यो वर्षको तेस्रो त्रैमासदेखि थप पाँच उत्पादकबाट खोप निर्यात गर्ने समाचारहरूमा जनाइएको छ । भारत आफैंले हाल कोभिसिल्ड र कोभ्याक्सिन खोप उत्पादन गरिरहेको छ ।
भारतले यो वर्षको अन्त्यसम्ममा जोनसन एण्ड जोनसन, क्याडिला जाइडस, नोभाभेक्स र नासल भ्याक्सिनको प्रयोगलाई समेत अघि बढाउने सम्भावना रहेको समाचारमा उल्लेख छ ।