तेहरान । इरानका विदेशमन्त्रीले आफ्नो भूमिगत परमाणु स्थलमा भएको आक्रमणको बदला लिने चेतावनी दिएका छन् । नातान्ज युरेनियम प्लान्टमा आइतबार ‘परमाणविक आतंकवादी’ले आक्रमण गरेको इरानी अधिकारीरूले बताएका छन् ।

इरानले युरेनियमलाई समृद्ध बनाउन केही समयअघि मात्र नयाँ उन्नत सेन्ट्रिफ्युज सक्रिय गरेको थियो । उक्त आक्रमणमा इरानले इजरायललाई दोष दिँदै आएको छ ।

इजरायलले यस विषयमा कुनै प्रतिक्रिया जनाएको छैन । यद्यपि इजरायलका स्थानीय रेडियोहरूले भने स्रोतलाई उदृत गर्दै उक्त कार्यमा इजरायली खुफिया संस्था मोसादको हात रहेको बताएका छन् । उक्त ‘अपरेसन’मा इरानले उल्लेख गरेभन्दा धेरै क्षति भएको बताइएको छ ।

अमेरिकी खुफिया अधिकारीले न्यूयोर्क टाइम्सलाई बताएअनुसार एक ठूलो विस्फोटले स्वतन्त्र आन्तरिक विद्युत व्यवस्थालाई पूर्ण रूपमा नष्ट गरिदिएको बीबीसीले उल्लेख गरेको छ । उक्त स्थानमा युरेनियम संवद्र्धन गर्न कम्तीमा पनि ९ महिना लाग्ने अनुमान गरिएको छ ।

इरानी समाचार संस्था नुरले अनुसन्धान मन्त्रालयको स्रोतलाई उदृत गर्दै विद्युत व्यवस्थामा बाधा पुर्याउने ‘मुख्य अपराधी’को पहिचान भएको र गिरफ्तारीको लागि आवश्यक कदम चालिने उल्लेख गरेको छ । बीबीसी