काठमाडौं । विश्वमा मानवअधिकारमाथि आक्रमण गर्न महामारीलाई हतियारको रुपमा प्रयोग गरिएको एम्नेष्टी इन्टरनेसनलले निष्कर्ष निकालेको छ । बुधबार सन् २०२०/०२१ को प्रतिवेदन सार्वजनिक गर्दै एम्नेष्टीले मानवअधिकार कुण्ठित गर्न महामारीलाई हतियारका रुपमा प्रयोग गरिएको उल्लेख गरेको हो ।
विषाक्त समूहका केही नेताहरुले आफ्नो शक्ति मजबुत बनाउन कोभिड संकटको प्रयोग गरेको एम्नेष्टीले औँल्याएको छ । सन् २०२० मा सरकार प्रमुखले महामारीका विषयमा टिप्पणी गर्नेलाई अपराधीकरण गर्ने कानुन पारित गर्ने विषय एउटा प्रमुख प्रवृत्तिको रुपमा रहन गएको प्रतिवेदनमा जनाइएको छ ।
हंगेरीमा प्रधानमन्त्री भिक्टर ओर्बानको सरकारले कोभिड–१९ का बारेमा ‘गलत सूचना’ फैलाउने कार्यमा पाँच वर्षसम्म कैद सजाय हुने प्रावधानसहित फौजदारी संहिता संशोधन गरेको थियो ।
यसैगरी, खाडी देशहरु बहराइन, कुवेत, ओमान, साउदी अरेबिया र संयुक्त अरब इमिरेट्समा कोभिड–१९ सम्बन्धी सरकारी प्रतिकार्यका बारेमा सामाजिक सञ्जालमा टिप्पणी गर्नेहरुलाई ‘गलत समाचार’ फैलाएको आरोपमा अभियोजन गर्नेदेखि लिएर अभिव्यक्ति स्वतन्त्रता दबाउने बहानाका रुपमा प्रयोग गरेको प्रतिवेदनमा उल्लेख छ ।
यसैगरी, नेपालमा समेत शान्तिपूर्ण प्रदर्शनका क्रममा सुरक्षा बलले प्रदर्शनकारी तथा अधिकारकर्मीमाथि बल प्रयोग गरेको एम्नेष्टीको निष्कर्ष छ ।
