ब्राजिलिया । गएको मार्च महिनामा मात्र ब्राजिलमा कोरोना भाइरस संक्रमणका कारण ६६ हजार ५७० जनाको ज्यान गएको छ । यो संख्या फेब्रुअरीको तुलनामा दोब्बरले बढी रहेको बीबीसीले जनाएको छ ।
कोरोना भाइरस संक्रमण र मृत्युदर बढेसँगै यहाँको स्वास्थ्य सेवा नाजुक बन्दै गएको छ । कोरोना नियन्त्रणमा प्रभावकारी कदम चाल्न नसकेको भन्दै राष्ट्रपति जैर बोल्सोनारोको आलोचना भइरहे पनि उनले लकडाउनका विषयमा असन्तुष्टि जनाउँदै आएका छन् ।
“हाम्रा दुई शत्रु थिए, दुई नै छन्– भाइरस र बेरोजगारी,” बोल्सोनारोले बुधबार भने, “यो सत्यता हो । हामी घरमै बसेर यी समस्याको समाधान गर्न सक्दैनौं ।”
बुधबार मात्र कोरोनाका कारण ३ हजार ८०० को मृत्यु हुँदा ९० हजार नयाँ संक्रमित थपिएका थिए । ब्राजिलमा दैनिक मृत्यु हुनेको संख्या विश्वभरका मृतकको एक चौथाइ रहेको बताइएको छ ।