वासिङ्टन । फेसबुकले आफ्नो ‘प्लेटफर्म’बाट अमेरिकी पूर्व राष्ट्रपति डोनाल्ड ट्रम्प भएको भिडियो हटाइदिएको छ । पूर्व राष्ट्रपति ट्रम्पकी बुहारी लारा ट्रम्पले आफ्नो पेजमा राखेकी डोनाल्ड ट्रम्पसँगको भिडियो अन्तरवार्ता फेसबुकले हटाइदिएको हो ।
“फेसबुक र इन्स्टाग्राममा राखिने डोनाल्ड ट्रम्पको आवाज भएका सामग्री हटाइने छ र उक्त अकाउन्टमा अतिरिक्त सीमा लागू हुनेछ,” लारा ट्रम्पलाई फेसबुकबाट प्राप्त भएको मेसेजमा उल्लेख गरिएको छ ।
फक्स न्यूजमा पत्रकार समेत रहेकी लाराले आफ्नो अनलाइन कार्यक्रम ‘द राइट भ्यू’का लागि बनाएकी उक्त भिडिया फेसबुकले हटाइदिएको हो ।
“अर्थात् हामी जर्ज ओरविलको उपन्यास १९८४ मा चित्रित अवस्थाको निकै निकट पुगेका छौं,” फेसबुकको कदमलाई सर्वसत्तावादसँग तुलना गर्दै लाराले आफ्नो इन्स्टाग्राममा लेखेकी छिन् ।
गएको जनवरीमा वासिङ्टनस्थित क्यापिटल हिलमा ट्रम्पका समर्थकहरुले दंगा गरेपछि फेसबुकले ट्रम्पमाथि प्रतिबन्ध लगाएको थियो । उनलाई ट्वीटर र यु–ट्युवले समेत प्रतिबन्ध लगाएका छन् ।
