बीबीसी । कोरोना भाइरसको खोप, खोप पासपोर्ट र नेगेटिभ टेस्ट रिपोर्टको नक्कली प्रमाणपत्र डार्कनेटमा बिक्री वितरण हुने गरेको रहस्य खुलेको छ ।

एष्ट्राजेनिका, स्पुतनिक, सिनोफर्म र जोनसन एण्ड जोनसनको एक डोज खोप ५०० देखि ७५० अमेरिकी डलरसम्ममा बिक्री भएको पाइएको बीबीसीले जनाएको छ ।

डार्क वेव पनि भनिने डार्कनेट इन्टरनेटको त्यस्तो अंश हो जसमा प्रवेश गर्न विशेष किसिमको इन्टरनेट ब्राउजरको आवश्यकता पर्दछ । पछिल्लो समय डार्कनेट मानव तस्करी, लागू पदार्थ र हतियार कारोबारलगायतका गैरकानुनी कार्यका प्रयोग हुँदै आएको छ ।

पहिचान लुकाएर तस्करहरुले खोप लगाएको नक्कली प्रमाणपत्र समेत कम्तिमा १५० डलरमा बिक्री गरिरहेको बताइएको छ ।

डार्कनेटमा खोपसम्बन्धि विज्ञापनहरु समेत तिब्र रुपमा बढेको पाइएको छ । यद्यपी यसरी बिक्री हुने ती खोपहरु असली हो वा होइन भन्ने स्पष्ट भएको छैन ।

जनवरीदेखि गरिएको अध्ययनमा यस्ता विज्ञापनको मात्रा ३ गुणाले बढेको पाइएको बताइएको छ ।