एथेन्स । ग्रीसले आगामी महिनादेखि आफ्ना नागरिकलाई निःशुल्क ‘सेल्फ टेस्टिङ किट’ वितरण गर्ने भएको छ । कोरोनाभाइरस संक्रमणले स्वास्थ्य सेवा प्रणालीमा परेको असर कम गर्ने उद्देश्यले ग्रीसले यस्तो टेस्ट किट वितरण गर्न लागेको समाचार संस्था रोयटर्सले जनाएको छ ।

सामाजिक सुरक्षा प्रणालीमा आबद्ध सबै नागरिकलाई फार्मेसीमार्फत प्रत्येक महिना चारवटा टेस्ट किट वितरण गरिने शनिबार त्यहाँका सरकारी अधिकारीहरुले जानकारी दिएका हुन् । उक्त टेस्ट किट ९५ देखि ९९ प्रतिशतसम्म प्रभावकारी रहेको दाबी गरिएको छ ।

नयाँ प्रकारको टेस्ट किट सहज र निःशुल्क उपलब्ध गराउनेमा ग्रीस पहिलो युरोपेली राष्ट्र बनेको यहाँको सरकारले जनाएको छ । ग्रीसमा अहिलेसम्म कोरोनाभाइरसका कुल संक्रमितको संख्या दुई लाख ३३ हजार ७९ पुगेको छ भने मृतकको संख्या सात हजार ३६१ पुगेको छ ।