बीबीसी । म्यानमार सेनाले नेतृ आङ सान सुकीमाथि अवैध रुपमा ६ लाख डलर र सुन लिएको नयाँ अभियोग लगाएको छ । यो आरोप सेनाले उनीमाथि जारी गरेको अहिलेसम्मकै सबैभन्दा ठूलो अभियोग भएको बताइएको छ । फेब्रुअरी १ मा सेनाको कू जारी भएदेखि उनलाई कैद गरि राखिएको छ ।
यसअघि उनलाई सुरक्षाकर्मीले बोक्ने ‘वाकीटकी’ लगायतका डिभाइस अवैध रुपमा राखेको अनि कोभिडसम्बन्धी नियमहरूको उल्लंघन गरी चुनाव प्रचार गरेको आरोप लगाइएको थियो ।
उनीमाथि जारी यो नयाँ अभियोगसम्बन्धी कुनै प्रमाण प्रस्तुत गरिएको छैन । त्यस्तै राष्ट्रपति विन मिन्टसहित क्याबिनेटका अन्य मन्त्रीहरूलाई पनि भ्रष्टाचार गरेको सेनाको आरोप छ । स्वतन्त्र अन्तर्राष्ट्रिय अवलोकनकर्ताहरूले सेनाको यो नयाँ दाबीलाई आधारहीन बताइरहेका छन् ।
सुकीको रिहाइ र देशमा लोकतन्त्रको पुनःस्थापनाको माग गर्दै म्यानमारमा अहिले पनि देशभर आन्दोलन जारी छ । यसबीच सुरक्षाकर्मीको गोली लागेर ५० भन्दा धेरै सर्वसाधारणले ज्यान गुमाइसकेका छन् । बिहीबार पनि देशभरबाट कम्तीमा सात प्रदर्शनकारीको मृत्यु भएको खबर गरिएको छ ।
अन्तर्राष्ट्रिय समुदायबाट लगातार दबाब आइरहे पनि सेनाले सबै आलोचना बेवास्ता गरिरहेको छ र उल्टै सुकीलाई सम्पूर्ण हिंसाका लागि जिम्मेवार ठहर्याइएको छ ।
