बीबीसी । थाइल्यान्डका प्रधानमन्त्री प्रायुथ छान–ओछाले हालैको एक प्रेस सम्मेलनमा सञ्चारकर्मीहरुको प्रश्न मन नपरेपछि उनीहरुमाथि स्यानिटाइजर छर्किएका छन् ।
मन्त्रिपरिषद् फेरबदल गर्नेसम्बन्धी प्रश्न गरिएपछि उनले यसको प्रतिक्रियामा त्यहाँ उपस्थित सबै रिपोर्टरहरुलाई माथिबाट स्यानिटाइजर छर्किएका हुन् । रिटायर पुलिस जेनेरल प्रयुथ, २०१४ मा सेनाको ‘कू’ पछि सत्तामा आएका हुन् र विगतमा पनि उनी प्रेस सम्मलेनका कार्यक्रमहरुमा अनौठो व्यवहारका कारण चर्चामा आइसकेका छन् ।
सेनाले स्थापित गराएका प्रधानमन्त्री प्रायुथ, यसअघि सञ्चारकर्मीको टाउकोमा हिर्काउँदै गरेको अनि कान तान्दै गरेको अवस्थामा क्यामरामा देखा परेका थिए । त्यस्तै एकपटकको प्रेस सम्मेलनमा चाहिँ सञ्चारकर्मीहरुको प्रश्नको जवाफ दिन भनेर उनले आफू उपस्थित हुनुको सट्टा आफ्नो आकारको तस्बिरयुक्त कार्डबोर्ड पठाएका थिए । यसबारे पनि विश्वव्यापी चर्चा चलेको थियो ।
सार्वजानिक भिडियोमा पहिले उनले ‘अब अरु कुनै प्रश्न छ ?’ भनेर सोधेको देख्न सकिन्छ । त्यसपछि मन्त्रिपरिषद् फेरबदलसम्बन्धी एक सञ्चारकर्मीले प्रश्न गर्दा उनले छड्के आँखाले हेर्दै ‘यो कुरा प्रधानमन्त्रीलाई पहिले थाहा हुनुपर्ने होइन र ? यस्तो सोध्ने कुरा होइन’ भन्दै रिसाएका हुन् । यति भनेलगत्तै उनले नजिकैको स्यानिटाइजर बोतल लिएर त्यहाँ उपस्थित सबै सञ्चारकर्मीहरुमाथि छर्किएका छन् । यो घटना सरकारद्वारा गरिएको प्रत्यक्ष प्रशारणमा सार्वजानिक भएको थियो ।