काठमाडौं । नेपाल एयरलाइन्सको दोहा-काठमाडौंका लागि थप उडानहरु हुने भएका छन्।
यसरी थप भएका उडानहरु असोज १०, ११, १३ र १४ गतेको लागि तय गरिएको दोहास्थित नेपाली दूतावासले एक विज्ञप्ती जारी गर्दै जनाएको छ ।
यसअघि दूतावासले नाम प्रकाशित गरेको तर विभिन्न कारणले टिकट काट्न छुटेका व्यक्तिहरुले समेत टिकट लिन सक्ने दूतावासले जनाएको छ । उक्त उडानमा सहभागी हुन चाहने नेपालीहरुले दूतावासले तोकेको ट्राभल एजेन्सीमा सम्पर्क गर्नपर्ने छ ।
सरकारको भदौ ४ को निर्णय बमोजिम पीसीआर परीक्षण गरी ७२ घण्टाभित्रको कोभिड - १९ पीसीआर परीक्षण गरी कोरोना संक्रमण नभएको प्रमाण लिएका यात्रुले मात्र नेपाल यात्रा गर्न पाइने छ । यात्रा गर्दा उक्त प्रमाणपत्रको सक्कल साथमा राख्नुपर्नेछ । साथै विमानस्थल चेकिङ काउन्टरका लागि एक प्रति फोटोकपीसमेत साथमा राख्नु पर्नेछ ।
कोरोना परीक्षण नगरी नेपाल फर्किन चाहनेहरुको हकमा आफ्नै खर्चमा ७ दिनको होटल क्वारेन्टिनमा बस्नु पर्ने तथा कोराना परीक्षण गरेका र नगरेका यात्रुहरु एउटै उडानमा यात्रा गर्न नपाइने व्यवस्था रहेको छ ।
होटल क्वारेन्टिनको खर्च टिकट काटने बेलामा लिने र होटललाई भुक्तानी गर्ने कार्य सम्बन्धित एअरलाईन्सले नै गर्नु पर्नेछ । नेपाल फर्किने प्रयोजनका लागि कतारका तोकिएका निजी अस्पतालबाहेक सरकारी स्वास्थ्य केन्द्रहरुमा कोभिड १९ को कोरोना परीक्षण निशुल्क वा न्यूनतम शुल्कमा गर्न सकिने दूतावासले जान जनाएको छ ।
उक्त उडानको हवाई भाडा नेपाली रुपयाँ ४५ हजार ९९० (कतारी रियाल १,४३०) लाग्ने दूतावासले जनाएको छ ।
दूतावासको प्राथमिकता सूचीमा नाम पर्न वा हवाई टिकट खरिद गर्न थप शुल्क बुझाउनु परेको गुनासाहरु दूतावासले प्राप्त गरेकोले यस प्रकारको कुनै शुल्क तिर्नु नपर्ने दूतावासले स्पष्ट पारेको छ । त्यस्तो शुल्क असुल गरेको पाइएमा कारबाही गरिने जनाइएको छ ।
सुत्केरी तथा गर्भवती महिला र कोभिड–१९ बाहेक अन्य कारणले गम्भीर स्वास्थ्य समस्या भएका व्यक्तिहरुले आफूलाई स्वास्थ्य परीक्षण गर्ने चिकित्सक वा स्वास्थ्य संस्थाबाट 'फिट टु फ्लाई' सिफारिसपत्र अनिवार्य साथमा लिएर मात्र विमानस्थल जानुपर्ने छ ।