काठमाडौं । ओमानले छैटौं उडानबाट नेपाल फर्किन पाउनेहरुको नामावली सार्वजनिक गरेको छ । दूतावासले सोमबार एक सूचना जारी गर्दै १६० जना नेपालीहरुको नामावली सार्वजनिक गरेको हो ।
कोभिड-१९ को विश्वव्यापी संक्रमणको कारणबाट उत्पन्न असहज परिस्थितिका कारण स्वदेश फर्किनै पर्ने नेपाली नागरिकहरुको सम्बन्धमा “नेपाली नागरिकलाई स्वदेश आउन सहजीकरण गर्ने सम्बन्धी आदेश २०७७ तथा कार्ययोजना २०७७” मा तोकिएको प्रावधान अनुरुप उनीहरु नेपाल फर्कन पाउने भएका हुन् ।
दूतावासमा विभिन्न माध्यमबाट नाम टिपाएकामध्ये प्राथमिकताका आधारमा सलाम एयरको भदौ ३० (सेप्टेम्बर १५) को छैटौं उडानमार्फत नेपाल फर्किन पाउने भएका हुन् ।
उक्त उडानको एकतर्फी हवाइ भाडा ११५ ओमानी रियल (२० केजी लगेज तथा ७ केजी. ह्यान्ड ब्याग) तोकिएको छ ।
दूतावासबाट प्रकाशित नामावली बमोजिमकाहरूले नेपाल फर्किन भदौ १३ गतेभित्र कोभिड १९ को पीसीआर परीक्षण गर्नसमेत अनुरोध गरेको छ । दूतावासले कोरोना परीक्षण गर्ने केन्द्रहरू तथा टिकट काट्ने प्रक्रियासम्बन्धी थप विवरणपछि अर्को सूचनामा जारी गरिने जनाएको छ ।
ओमानबाट नेपालका लागि आगामी उडान यही असोज ९ (२५ सेप्टेम्बर) मा हुने गरी तयारी भइरहेकोले नेपाल फर्किनै पर्ने समस्यामा भएकाहरूले दूतावासमा सम्पर्क गर्न समेत अनुरोध गरेको छ ।
